ޔުއެފާ ޗެމްޕިއަންސްލީގުގެ ގްރޫޕް ބީގައި ރޭ އަމިއްލަ ދަނޑުގައި ނެދަލޭންޑްސްގެ ޕީއެސްވީ 4-0 ގެ ނަތީޖާއަކުން ބަލިކޮށް އާސެނަލް އިން މުބާރާތުގެ ފެށުން ރަނގަޅުކޮށްފި އެވެ.

2016/17 ވަނަ ސީޒަންގެ ފަހުން ފުރަތަމަ ފަހަރަށް ޗެންޕިްއަންސް ލީގުގެ ގްރޫޕް ސްޓޭޖުން ޖާގަހޯދި އާސެނަލް އިން ރޭގެ މެޗުގެ ފުރަތަަމަ ހާފުގައި ވަނީ ތިން ލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު މެޗު ފެށިގެން 8 ވަނަ މިނެޓުގައި ކާމިޔާބުކޮށްދިނީ އިގިރޭސި ފޯވާޑް ބަކަޔޯ ސަކާ އެވެ.

މިއީ އެޓީމުގެ ކެޕްޓަން މާޓިން އޮޑެގާޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ދެވަނަ ލަނޑު ފުރަތަމަ ހާފުގެ 20 ވަނަ މިނެޓުގައި ކާމިޔާބުކޮށްދިނީ ބަލްޖިއަމްގެ މިޑްފީލްޑަރު ލިއަންޑުރޯ ޓްރޮސާޑް އެވެ. މިއީ އެޓީމުގެ ފޯވާޑް ބަކަޔޯ ސަކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި އާސެނަލް އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 38 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ގެބްރިއަލް ޖީސަސް އެވެ. މިއީ ޓްރޮސާޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އާސެނަލް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޕީއެސްވީ އިން އެޓީމުގެ ކުޅުން ރަގަޅު ކުރި ނަމަވެސް މިހާފުގައި ވެސް އާސެނަލްގެ ގޯލާއި އަމާޒުކޮށް މާނުރައްކާތެރި ހަމަލާތަކެއް އެޓީމަށް ފޮނުވާލެވިފައެއް ނުވެއެވެ.

މިމެޗުގައި އާސެނަލް އިން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ ކެޕްޓަން މާޓިން އޮޑެގާޑް އެވެ. މިއީ އެޓީމުގެ އިގިރޭސި ފޯވާޑް ރެއިސް ނެލްސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން އާސެނަލް ކުރީގައި އޮވެގެންނެވެ.

ރޭ ކުޅެވުނު މިގުރޫޕްގެ ދެވަނަ މެޗުގައި ފްރާންސްގެ ލެންސް އާއި ސްޕެއިންގެ ސެވިއްޔާ ވާދަކުރި މެޗު ނިމެން 1-1 ގެ ނަތީޖާއަކުން ދެޓީމް އެއްވަރުވެގެންނެވެ.