ހައި ކޯޓުގެ ކުރީގެ ފަނޑިޔާރު އަބްދުއްރައޫފް އިބްރާހިމް އިދިކޮޅު ޕީޕީއެމާ ގުޅިވަޑައިގެންފި އެވެ.
ޕީޕީއެމްގެ އޮފީހުގައި ރޭ ބޭއްްވުނު ކުޑަ ހަފްލާއެއްގެ ތެރެއިން ރައޫފާއި މާލެ ސިޓީ ކައުންސިލްގެ ކުރީގެ ޖޭޕީ މެންބަރު އަހުމަދު ހަމީދު (ފްލައި) ވެސް ޕީޕީއެމަށް ސޮއިކުރެއްވައި ފޯމު ވަނީ ރަނިންމޭޓް, ހުސައިން މުހައްމަދު ލަތީފް (ސެމްބެ) އާ ހަވާލު ކުރައްވާފައެވެ.
ހައިކޯޓުގެ ފަނޑިޔާރު ކަމުގައި 11 އަހަރު ހުންނެވުމަށްފަހު ރައޫފް އެ މަގާމުން އިސްތިއުފާ ދެއްވީ މެއި 31، 2022 ގައެވެ.
ހައި ކޯޓުގެ ފަނޑިޔާރު ކަމުން ރައޫފް އިސްތިއުފާ ދެއްވީ ފަނޑިޔާރުންނަށް ސަރުކާރުން ދޫކުރި ފްލެޓްތަކެއް ހާއްސަ އަގުތަކެއްގައި ބައްލަވައިގަނެފައިވާ ކަމަށާއި އެ ކަމުގެ ބަދަލެއްގެ ގޮތުން އެ ކޯޓުގެ ގަޒިއްޔާއެއްގެ ހުކުމް ކުރުމަށް ނިންމެވި ކަމަށް ތުހުމަތުކޮށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބެލި ސުލޫކީ މައްސަލައެއް ސާބިތުވެ، އޭނާ މަގާމުން ވަކިކުރަން ރައްޔިތުންގެ މަޖިލީހަށް ފޮނުވުމުންނެވެ.
އެކަމަކު މަޖިލީހުގެ ޖުޑިޝަރީ ކޮމިޓީން ވަނީ އެ މައްސަލަ ޖޭއެސްސީން ބަލާފައިވަނީ ފުރިހަމަކުރަން ޖެހޭ އިޖުރާއަތްތަކެއް ފުރިހަމަ ނުކޮށް ކަމަށް ނިންމާ އަލުން އެ ކޮމިޝަނަށް މައްސަލަ ފޮނުވާލާފަ އެވެ.
Advertisement
This content is created and paid for by advertisers and does not involve Voice Journalists
