ރިޔާސީ އިންތިހާބުގެ ދެވަނަބުރުގައި ކެމްޕެއިން ކުރެއްވުމަށް އަތޮޅު ތެރެއަށް ވަޑައިނުގެން މާލޭގައި ބަނޑަހަ ޖަހައިގެން ހުންނަވަނީ އިންތިހާބުގެ ދެވަނަ ބުރުގައި ވައްކަން ކުރެއްވުމަށް ކަމުގައި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހްމަދް ޝިޔާމް ތުހުމަތު ކުރައްވައިފިއެވެ.
މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަބުރުގެ ކެމްޕެއިންގައި މިރޭ ބ ކަމަދޫގައި ބޭއްވި ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒުގެ ކެމްޕޭން ޖަލްސާގައި ވާހަކަދައްކަވަމުން ޝިޔާމް ވިދާޅުވީ ދިވެހި ދައުލަތުގެ ހުރިހާ ފައިސާއެއް ހިއްޕަވައިގެން އިބްރާހިމް މުޙައްމަދު ޞާލިޙް ކުރައްވާ ކަމެއް ނޭނގެ ކަމަށާއި ސެޕްޓެމްބަރު 9 އިން ފެށިގެން އަދިވެސް އެ ހުންނަވަނީ މާލޭގައި ކަމަށެވެ.
އަޅުގަނޑުމެންނަށް މި އެނގުނީ ފަހުން %38 ލިބުނީމާ ދެން ނިންމީ ދެވަނަ ބުރުން ވައްކަން ކުރަން ކަން. ވައްކަން ކުރަން ނިންމައިގެން އެ ނުބައިނުލަފާ ރޭވުންތައް ރޭވުމުގައި އަވަދިނެތި މި ހުންނެވީ މާލޭގަ ބަނޑަހަ ޖަހައިގެން
އަހްމަދު ޝިޔާމް
މީގެ އިތުރުން ޝިޔާމް ވިދާޅުވީ، އެކަން އެހެން ކުރައްވަން ޖެހިވަޑައިގަތީ ކެމްޕެއިން އެޖެންޓް މާރިޔާ އަޙްމަދު ދީދީއަށާއި ''ފައިސާ ފޮށި'' ހިފައިގެން ހުރި ބޭފުޅާއަކަށް ވެސް މިހާރު އިތުބާރެއް ނުކުރެވޭތީ ކަމަށާއި، ރައްޔިތެއްގެ ހާލު ރައީސްއަށް އަހައި ނުލެވިގެން އުޅުއްވަނީ އަމިއްލަފުޅަށް ހުރިހާ ކަމެއް ކުރައްވަން ޖެހިވަޑައިގަތުމުން ކަމުގައި ޝިޔާމް ވަނީ ވިދާޅުވެފައެވެ.
އަދި ހަމަ އެޔާއެކު އަރިހުގައި ތިބި އެންމެން ރައީސް އިބްރާހިމް މުހައްމަދު ޞާލިހް ދޫކުރައްވާ ހިނގައްޖެ ކަމަށާއި ކެމްޕޭންކޮށް ދިނުމަށް ރަށްރަށުގައި ތިބި އިސް ފަރާތްތައްވެސް މިއަދު އެކަން ހުއްޓާލައިފައި ގެއަށް ވަދެއްޖެ ކަމުގައި ވިދާޅުވެ ޝިޔާމް ވަނީ ރައީސް ޞާލިހަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
