ޔުއެފާ ޔޫރޮޕާ ލީގު ގްރޫޕް އީގައި ބުރާސްފަތި ދުވަހުގެ ރޭ ރަށުން ބޭރުގައި 3-1 ގެ ނަތީޖާއަކުން އޮސްޓްރިއާގެ އެލްއޭއެސްކޭ އަތުން މޮޅުވެ ލިވަޕޫލް މުބާރާތުގެ ފެށުން ރަނގަޅުކޮށްފި އެވެ.

މި މެޗަކީ 2016 ވަނަ އަހަރު ޔޫރޮޕާ ލީގު ފައިނަލްގައި ސްޕެއިންގެ ސެވިއްޔާ އަތުން ބަލިވި ފަހުން ލިވަޕޫލު އިން މި މުބާރާތުގައި ކުޅުނު ފުރަތަމަ މެޗެވެ. އަދި މިއީ އެޓީމު އެންމެ ފަހުން ކުޅުނު 17 މެޗުގެ ތެރެއިިން މޮޅުވި 12 ވަނަ މެޗެވެ. އަދި އަނެއް ފަސް މެޗު ނިމުނީ އެއްވަރުވެގެންނެވެ.

މިމެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މިމެޗުގައި ފުރަތަަމަ ލަނޑުޖަހައި ކުރިހޯދީ އެލްއޭއެސްކޭ އިންނެވެ. މިލަނޑު ފުރަތަމަ ހާފުގެ 14 ވަނަ މިނެޓުގައި އެޓީމަށް ކާމިޔާބުކޮށްދިނީ މިޑްފީލްޑަރު ފްލޯރިއަން ފްލެކަރ އެވެ. މިއީ އެޓީމަށް ލިބުނު ކޯނަރެއްގައި މިޑްފީލްޑަރު ސަޝާ ހޯރްވަތް ގޯލު ކުރިމައްޗަށް ހުރަސްކޮށްދިން ބޯޅައެއްގައި ލިވަޕޫލުގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އެލްއޭއެސްކޭ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ލިވަޕޫލުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި އިރު، އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 56 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ އުރުގުއާއީގެ ފޯވާޑް ޑާވިން ނުނޭޒް އެވެ. އަދި މިމެޗުގައި ފުރަތަމަ ފަހަރަށް ލިވަޕޫލުން ލީޑު ހޯދި ލަނޑު ފަހުހާފުގެ 63 ވަނަ މިނެޓުގައި ކާމިޔާބުކޮށްދިނީ ކޮލަމްބިއާގެ ފޯވާޑް ލުއިސް ޑިއާޒް އެވެ.

މިމެޗުގައި ލިވަޕޫލުން ކާމިޔާބުކުރިއިރު ތިންވަނަ ލަނޑު މެޗު ނިމެން ދެ މިނިޓަށްވެފައި ވަނިކޮށް ކާމިޔާބުކޮށްދިނީ މުހައްމަދު ސަލާހް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.