މިމަހު 30 ވަނަ ދުވަހު ބާއްވާ ރިޔާސީ އިންތިޚާބު ކާމިޔާބު ކުރައްވައި ވެރިކަމަށް ވަޑައިގެންފި ނަމަ، ވެރިކަމުގެ 5 އަހަރަށް ބަހާލައިގެން މިނިވަން މުއައްސަސާ ތަކާއި، ސަރުކާރުގެ މުވައްޒުން އަދި ހުރިހާ ފަރާތްތަކެއްގެ މުސާރައަށް ހެޔޮ ބަދަލުތަކެއް ގެނެސްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުޢިއްޒު ވިދާޅުވެއްޖެއެވެ.

މުޢިއްޒު މިފަދައިން ވިދާޅުވެފައި ވަނީ "އަސްކް މުޢިއްޒު" ގެ ނަމުގައި އެމަނިކުފާނާއި ބޭނުން ސުވާލެއް ކުރުމުގެ ފުރުސަތު އާއްމުންނަށް ހުޅުވާލައި ގެނެސްދިން ޕްރޮގްރާމެއްގައި، އެހުންތެރިއެއް ކުރި ސުވާލަކަށް ޖަވާބު ދެއްވަމުންނެވެ.

އެގޮތުން، ފުލުހުންނާ ސިފައިންގެ މުސާރަ ދެގުނަ ކުރާނެ ވާހަކަ ޑރ. މުޢިއްޒު ވިދާޅުވެފައިވާއިރު، ރާއްޖޭގެ އިޤްތިޞާދީ ޙާލަތު މިއޮތްގޮތުން އެއީ ކުރެވިދާނެ ކަމެއްތޯ އާއި އަދި އެއީ ސަރުކާރުގެ ބަޖެޓަށް ކޭޓަރ ކުރެވޭނެ ވަރު ކަމެއްތޯ މީހަކު ސުވާލު ކޮށްފައިވެއެވެ.

Advertisement

އެ ސުވާލަށް ޖަވާބު ދެއްވަމުން ޑރ.މުޢިއްޒު ވިދާޅުވީ އެކަން ކުރުމަށް ނިންމާފައިވަނީ އެއްފަހަރާ ނޫން ކަމަށާއި، މުސާރަ ބޮޑުކުރުމަށް ނިންމާފައިވަނީ 5 އަހަރުގެ ދައުރަށް ބަހާލައިގެން 3 ފަހަރެއްގެ މަތިން ކަމަށެވެ. ހަމަ އެއާއެކު ދެންހުރި ޔުނީފޯމް ވަޒީފާތަކާއި، މިނިވަން މުއައްސަސާތަކާއި، އަދި ސަރުކާރުގެ އެހެން އޮފީސް ތަކާއި ހުރިހާ ފަރާތްތަކަށްވެސް 5 އަހަރު ތެރެއަށް ބަހާލައިގެން އެކަށީގެންވާ ހެޔޮ ބަދަލެއް ގެނެސްދެއްވާނެ ކަމަށް މުޢިއްޒު ވިދާޅުވިއެވެ.

އެ މުވައްސަސާ ތަކުގެ މުސާރަ ބޮޑު ކުރަން ބަލާއިރު، ދިވެހި ރާއްޖޭގެ އިޤްތިޞާދު ވަރަށްބޮޑަށް ރަނގަޅުކުރަން ޖެހިފައިވާކަންވެސް މުޢިއްޒު ފާހަގަކުރެއްވިއެވެ. އަދި މުސާރަތަކަށް ހެޔޮ ބަދަލު ގެނެސްދެވޭނީ އިޤްތިޞާދަށް ކުރިއެރުން ގެނެސްދީ އާމްދަނީ އިތުރުކުރެވިގެންދާ މިންވަރަކުން ކަމަށްވެސް ވިދާޅުވި އެވެ. 

"މިރާއްޖޭގެ އިޤްތިޞާދު މިވަނީ ވަރަށްބޮޑަށް ރަނގަޅުކުރަންޖެހިފަ. އެކަންކަން ރަނގަޅުކުރެވެމުންދާ މިންވަރަކުން ހަމަހުރިހާ ފަރާތްތަކެއްގެ މުސާރައަށް ހެޔޮ ބަދަލުތަކެއް ގެނެސްދޭނަން" މުޢިއްޒު ވިދާޅުވިއެވެ.

އެހެންކަމުން ޕީޕީއެމް/ޕީއެންސީއިން 3 އަހަރަށް ބަހާލައިގެން ހުށަހަޅާ އިކޮނޮމިކް ޕްލޭންގެ ތެރެއިން އެކަން ކުރެވޭނެ ކަމުގެ ޔަޤީންކަން ޑރ. މުޢިއްޒު ވަނީ ދެއްވާފައެވެ.