ރިޔާސީ އިންތިޚާބުގެ ދެވަނަ ބުރުގެ ރީރެޖިސްޓޭޝަން ލިސްޓަށް މިހާތަނަށް ލިބިފައިވަނީ 34 ޝަކުވާ ކަމަށް އިލެކްޝަންސް ކޮމިޝަނުން ބުނެފިއެވެ.

އެކޮމިޝަނުން މިހެން ބުނެފައިވަނީ މިއަދު އެކޮމިޝަނުން ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުންނެވެ.

ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އީސީގެ ނައިބު ރައީސް އިސްމާއިލް ޙަބީބް ވިދާޅުވީ މިހާތަނަށް ރީރެޖިސްޓޭޝަން ލިސްޓަށް ހުށައެޅިފައވަނީ 34 ޝަކުވާއެއް ކަމަށެވެ.

ވޯޓުލާ މީހުންގެ ލިސްޓަށް ޝަކުވާ ހުށައެޅުމަށް އީސީ އިން ދީފައިވާ ދެދުވަހުގެ މުއްދަތު މިރޭގެ 9:00 އާއި ހަމައަށް ހަމަވާނެއެވެ.

މިއަދުގެ ނޫސްވެރިންގެ ބައްދަލުވުމުގައި ހަބީބް ވިދާޅުވީ ރީރަޖިސްޓަރ ކުރުމަށް ގިނަ ޢަދަދެއްގެ ބަޔަކު ހުށައެޅުމާއި ގުޅިގެން ކުރެވުނު މަސައްކަތާއެކު ޝަކުވާ ހުށަހެޅުމަށް އިތުރު އިތުރު އެއްވެސް ވަގުތެއް މިހާރު ދެވެން ނެތް ކަމަށެވެ. ދެވަނަ ބުރަށް 47،000 އަށްވުރެއް ގިނަ ފަރާތްތަކުން ރީރަޖިސްޓްރީ ކޮށްފައިވެއެވެ.

މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި ޙަބީބް އިތުރަށް ވިދާޅުވެފައިވަނީ ރިޔާސީ އިންތިޚާބުގެ ފުރަތަމަ ބުރުގައި ވޯޓު ފެށިތައް ބެހެއްޓި މަރުކަޒުތަކުގެ ތެރެއިން 43 މަރުކަޒެއް ހުރި ތަންތަން ނޫން އެހެން ތަންތަނަށް ބަދަލުކޮށްފައިވާކަމަށެވެ.

ޙަބީބް ވިދާޅުވީ ވޯޓުލާ ބައެއް މަރުކަޒުތައް ހުރިގޮތުން ބައެއް ކަހަލަ ދަތިތައް ދިމާވި ކަމަށާއި، އެ ޝަކުވާތަކާ ގުޅިގެން އެއަށްވުރެއް ރަނގަޅު މަރުކަޒުތަކަށް ބަދަލުކުރަން އެގޮތަށް މަރުކަޒުތައް ބަދަލުކޮށްފައިވާ ކަމަށެވެ. އެހެންކަމުން ދެވަނަ ބުރުގައި ވޯޓުލާން ދާންޖެހޭތަން ޗެކުކުރުމަކީ މުހިންމު ކަމެއްކަން ފާހަގަކުރެއްވިއެވެ.

ދެވަނަ ބުރުގެ ވޯޓު ލުން ސެޕްޓެމްބަރު މަހުގެ 30 ގައި އޮންނަ އިރު އިލެކްޝަންސް އިން ބުނެފައިވަނީ ދެވަނަ ބުރަށް ބޭނުންވާ ވޯޓް ކަރުދާސް މިހާރު ޗާޕްކޮށް ނިމިފައިވާ ކަމަށެވެ.