ރިޔާސީ އިންތިހާބުގެ ފުރަތަމަ ބުރުގައި ގިނަ އަދަދެއްގެ ވޯޓު ބާތިލުވުމަސް މެދުވެރި ސަބަބުތައް ބަލައި، ދެ ވަނަ ބުރުގައި އެކަން މަދުކުރުމަށް ހާއްސަ ފިޔަވަޅުތަކެއް އަޅާފައިވާ ކަމަށް އިލެކްޝަން ކޮމިޝަން (އީސީ) އިން ބުނެއްފިއެވެ. 

މިއަދު ހެނދުނު އެ ކޮމިޝަންގެ އިންތިޚާބީ މަރުކަޒުގައި ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަންގެ ނައިބް ރައީސް އިސްމާއީލް ހަބީބް ވިދާޅުވީ، މި މަހުގެ 9 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި 4،000 އަށް ވުރެ ގިނަ ވޯޓު ބާތިލް ކަމަށް ކަނޑައަޅާފައިވާ ކަމަށާއި ގިނަ ވޯޓުތައް ބާތިލް ވެފައި ވަނީ ފާހަގަ މަތިން ދެ ފަހަރަށް ފާހަގަ ޖަހާފައި ހުރުމުން ކަމުގައިކަމަށެވެ. 

ވޯޓު ކަރުދާހުގައި އެއް ފާހަގައަށްވުރެ ގިނަ ފާހަގަ ޖަހައިފައިވާނަމަ އެ ވޯޓަކީ ބާތިލް ވޯޓެއްކަމުގައި ކަނޑައެޅިގެން ދާނެއެވެ. 

ބާތިލް ވޯޓު މަދުކުރުމަށް އެޅިފައިވާ ހާއްސަ ފިޔަވަޅުތައް ތަފްސީލުކޮށްދެއްވަމުން ހަބީބް ވިދާޅުވީ، ވޯޓު ކަރުދާހުގައި ފާހަގަ ޖަހަން ކަރުދާސްކޮޅު ބާއްވާ ތަނުގައި ބްރިސިލްބޯޑެއް ދެން އޮންނާނެ ކަމަށާއި އޭގެ ބޭނުމަކީ ފާހަގަ ޖަހަން ފަސޭހަ ކޮށްދިނުން ކަމުގައި ހަބީބް ވިދާޅުވިއެވެ. 

މީގެ އިތުރުންވެސް ހަބީބް ވިދާޅުވީ، ފާހަގަ ޖަހަން ބޭނުންކުރާ ގަލަންތައް ވެސް ދެލި ހިނގާ ގަލަންތަކަށް ބަދަލުކޮށްފައިވާނެ ކަމަށާއި ގަލަމުން ދެލި ނުހިނގައިގެން ދެން އުޅެން ނުޖެހޭނެ ކަމަށެވެ.

އަދި ހަމަ އެޔާއެކު ވޯޓުގެ ސިއްރު ހިފެހެއްޓުމަށްޓަކައި ދެވަނަ ބުރުގައި ވޯޓުލުމަށް ބޫތުގެ ތެރެއަށް ވަރަށް ބޮޑަށް ވަންނަންޖެހޭ ގޮތަށް ބޫތުގެ ޑިޒައިން ބަދަލުކޮށްފައިވާނެ ކަމަށް ވެސް ހަބީބް ވަނީ ވިދާޅުވެފައެވެ. 

ހަބީބް ވިދާޅުވި ގޮތުގައި ފުރަތަމަ ބުރުގެ ތަޖުރިބާ އަށް ބަލައި ދެ ވަނަ ބުރުގައި ރަނގަޅު ކުރަންވީ ކަންކަން ވަނީ ފާހަކޮށްފައިކަމަށާއި، ހާއްސަ ގޮތެއްގައި ވޯޓުގެ ސައްހަކަން ކަށަވަރު ކުރުމަށް، ކޮމިޝަނުން ދީފައިވާ އިރުޝާދުތަކަށް އޮފިޝަލުން އަހުލުވެރިކުރުމުގެ މަސައްކަތް ކުރަމުންދާކަންވެސް އޭނާ ވަނީ ފާހަގަ ކޮށްފައެވެ. 

މީގެ އިތުރުން ހަބީބް ފާހަގަ ކުރެއްވި ގޮތުގައި ފުރަތަމަ ބުރުގެ ވޯޓު ގުނުމުގައި ވަރަށް ބޮޑަށް މޮނީޓަރުންނާއި އޮބްޒާވަރުން މަރުކަޒުގެ ވެރިންގެ މައްޗަށް ނުފޫޒު ފޯރުވައިގެން ސައްހަ ވޯޓު ބާތިލް ވޯޓަކަށް ބަދަލުކޮށްފައި އެބަހުރި ކަމަށެވެ. އަދި އެއީ ވަރަށް ނުރައްކާތެރި ކަމެއްގެ ގޮތުގައި ފާހަގަކުރައްވައި ހަބީބް ވިދާޅުވީ، އޮފިޝަލުން އެފަދަ ނުފޫޒުތަކުން ދުރުވާން ޖެހޭނެ ކަމަށާއި މޮނީޓަރުންނާއި އޮބްޒާވަރުންނަށް އެފަދަ އަމަލުތައް ހިންގައިގެން ނުވާނެ ކަމަށެވެ. 

އޭނާ ވިދާޅުވި ގޮތުގައި ސައްހަ ވޯޓާއި ބާތިލް ވޯޓާ ގުޅޭ ގޮތުން ރައްޔިތުން އިތުރަށް ހޭލުންތެރިކުރުމުގެ މަސައްކަތް ވެސް އިލެކްޝަންސް ކޮމިޝަނުން އަންނަނީ ކުރަމުންނެވެ.