ރާއްޖޭގެ ބިމުގެ އެންމެ އިންޗިއެއްވެސް ބޭރު ބައެއްގެ އަތްދަށުގައި އޮންނަން ނުދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރޭ ހެންވޭރު ސޯސަން ޖަގަހައިގައި ބޭއްވި ކެމްޕޭނު ބައްދަލުވުމުގައި ވާހަކަދައްކަވަމުންނެވެ.
ރައީސް ޞާލިޙް ވިދާޅުވީ މިސަރުކާރޭ ކިޔައި ދައްކާ ވާހަކަ ތަކެއް އެބަހުރި ކަމަށާއި، އެއީ ރާއްޖޭގެ މިނިވަންކަމާއި އިސްތިޤްލާލްގެ ވާހަކައާއި މި ރާއްޖޭގައި ބޭރުގެ ސިފައިން ތިބި ކަމުގެ ވާހަކަ މެދު ނުކެނޑި ދައްކަމުން ދާކަމަށެވެ.
ރައީސް ވިދާޅުވީ އެމަނިކުފާނާއި އެކު މަސައްކަތް ކުރައްވާ ހުރިހާ ބޭފުޅުންނަށްވެސް އެއީ ދޮގު ވާހަކަތަކެއްކަން އެނގިވަޑައިގަންނަވާނެ ކަމަށެވެ.
"އަޅުގަނޑު ޔަޤީން ކަމާއި އެކު މިއަރުވަނީ ތިހުރިހާ ބޭފުޅުންނަށްވެސް މިރާއްޖެގެ ބިމުގެ އެންމެ އިންޗިއެއްވެސް އެންމެ ފަސްކޮޅެއްވެސް ބޭރުގެ ބައެއްގެ އަތް ދަށުގައި އޮންނާކަށެއް އަޅުގަނޑުމެން ފުރުސަތެއް ނުދޭނަން" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ރާއްޖޭގެ ބިމުން ބައެއް އެހެން ބަޔަކަށް މިލްކު ކުރެވޭ ގޮތައް ރާއްޖޭގެ ޤާނޫނަށް ބަދަލު ގެނައީ ކުރީގެ ސަރުކާރުން ކަމަށްވެސް ރޭގެ ޖަލްސާގައި ރައީސް ވިދާޅުވިއެވެ.
ރައީސް ވިދާޅުވީ މިރާއްޖޭގައި އެހެން ޤައުމެއްގެ ސިފައިން ތިބޭ ކަމަށްބުނެ ދައްކާ ވާހަކައަކީވެސް ބުހުތާނު ދޮގު ވާހަކަ ތަކެއް ކަމަށެވެ.
Advertisement
This content is created and paid for by advertisers and does not involve Voice Journalists
