މި މަހު 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ ވޯޓު ނަގާއިރު، މި ބުރުގައި އެމްޑީޕީގެ ކުރީގެ ރައީސް މުހައްމަދު ނަޝީދު އުފައްދަވާފައިވާ ޑިމޮކްރެޓްސް ޕާޓީން ވަކި ކޮޅެއް ނުނެގިޔަސް، ނަޝީދު، އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހަށް ތާއީދުކުރެއްވުމާ ގުޅޭ ގޮތުން ދެ ބޭފުޅުން މިއަދު މަޝްވަރާ ކުރެއްވި ކަމަށް ރައީސް ޞާލިހް ވިދާޅުވެއްޖެއެވެ.
ރައީސް ނަޝީދާއި ރައީސް ޞާލިހު މިއަދު ވަނީ ރައީސް އޮފީހުގައި ކުއްލި މަޝްވަރާ ބައްދަލުވުމެއް ބާއްވާފައެވެ.
އެ ބައްދަލުވުމަށްފަހު ނޫސްވެރިންނާ ވާހަކަ ދައްކަވަމުން، ރައީސް ޞާލިހު ވިދާޅުވީ ބައްދަލުވުގެ ތެރެއިން ރާއްޖޭގެ މިހާރު ސިޔާސީ މަޝްރަހުގައި ހިނގަމުންދާ ގިނަ ކަންކަމާއި ގުޅޭ ގޮތުން މަޝްވަރާ ކުރެއްވި ކަމަށެވެ.
އެގޮތުން ރައްޔިތުންގެ މަޖިލީހަށް މިހާރު ހުށަހެޅިފައިވާ ބަރުލަމާނީ ނިޒާމާއި ގުޅޭ ގަރާރާ ގޮތުންނާއި، ރައީސް ނަޝީދުގެ ޑިމޮކްރެޓްސް އިން ވަކި ކޮޅަކަށް ތާއީދު ނުކުރި ނަމަވެސް، ރިޔާސީ އިންތިހާބުގެ ދެވަނަ ބުރުގައި ރައީސް ނަޝީދުގެ ތާއީދު ރައީސް ޞާލިހަށް ކުރެއްވުމާއި ގުޅޭ ގޮތުން މަޝްވަރާ ކުރެވުނު ކަމަށް ރައީސް ޞާލިހު ވިދާޅުވިއެވެ.
ރާއްޖޭގެ ސިޔާސީ މަޝްރަހުގައި މިހާރު ހިނގަމުންދާ ކަންކަމާ ބެހޭގޮތުން އަޅުގަނޑުމެން މަޝްވަރާ ކުރީ. އޭގެ ތެރޭގައި އެއް ކަމަކީ މަޖިލީހުން އިހަށްދުވަހު ފާސްކުރި ނިޒާމީ ވޯޓާއި ގުޅޭގޮތުން ކުރިއަށް ދިޔުމުގައި ކަންކަން ކުރާނެ ގޮތަކާއި, އަދި ކުރިއަށް މިއޮތް ރިޔާސީ އިންތިހާބުގެ ދެވަނަ ބުރާ ގުޅޭގޮތުން ވެސް ވާހަކަ ދެއްކެވުނު. ރިޔާސީ އިންތިހާބުގެ ދެވަނަ ބުރުގައި އެބޭފުޅުންގެ ނިޔުޓްރަލް ސްޓޭންޑްގައި ތިއްބަވާނެކަމަށް. ދެން ނިޒާމީ ވޯޓް ގައި، ރިޔާސީ އިންތިހާބަށްފަހު ގައި އޭގެ މަސައްކަތްތައް ފަށައިގަތުމަށް އިލެކްޝަންސް ކޮމިޝަނުގައި އެދުމާ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސްގެ ވާހަކަފުޅާއި ގުޅިގެން ނޫސްވެރިއަކު ވަނީ، ދެވަނަ ބުރުގައި ޑިމޮކްރެޓްސް އިން ވަކި ކޮޅަކަށް ނުޖެހުނު ނަމަވެސް، ރައީސް ނަޝީދު، ރައީސް ޞާލިހަށް ތާއީދު ކުރެއްވުމާއި ގުޅޭގޮތުން މަޝްވަރާ ކުރެވުނު ތޯ ސުވާލު ކޮށްފައެވެ.
"އަޅުގަނޑުމެން އެއާ ބެހޭ ގޮތުން ވާހަކަ ދެއްކިން. އޭގެ ތަފްސީލުތައް ފަހުން ހާމަކުރާނަން،" ޖަވާބުގައި ރައީސް ޞާލިހު ވިދާޅުވި އެވެ.
މީގެ އިތުރުން ނިޒާމީ ވޯޓާއި ގުޅޭގޮތުން ކުރެވުނު އެހެން މަޝްވަރާ ތަކުގެ ތަފްސީލް ވެސް ފަހުން ހާމަކުރައްވާނެ ކަމަށް ރައީސް ޞާލިހު ވިދާޅުވިއެވެ. އަދި ދެވަނަ ބުރުގެ ނަތީޖާ ކޮންމެ ގޮތަކަށް ނުކުތަސް ނިޒާމީ ވޯޓުގެ ކަންކަން ކުރިއަށް ދާނެ ކަމަށް އެމަނިކުފާނު ވިދާޅުވި އެވެ.
ވޮއިސްއަށް މައުލޫމާތު ދިބިފައިވައިވާގޮތުގައި ރައީސް ނަޝީދުގެ މި ބައްދަލުވުމަކީ ނިޒާމީ ވޯޓުގެ ކަންކަން އިންތިޒާމު ކުރުމާއި މަގުފަހި ކުރުމަށް ސަރުކާރުން މަސައްކަތް ކުރިއަށް ގެންދިޔުމާއި ބެހޭގޮތުން ކުރެއްވި ބައްދަލުވުމެކެވެ.
ނިޒާމީ ވޮޓެއް ނެގުމަށް ތައްޔާރުވަމުން އަންނަ އިރު މިކަމަށް ބޭނުންވާ ބަޖެޓްވެސް މިހާތަނަށް ކަނޑައާޅާފައިނުވާކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
