ހުޅުމާލެ ފޭސް 3ގެ ބިންހިއްކުމުގެ މަޝްރޫއުވަނި ރަސްމީކޮށް ފަށައިފިއެވެ.
އިއްޔެ ފެށުނު މި މަޝްރޫޢު އާ ގުޅޭގޮތުން އާބަންކޯއިން ނެރުނު ނޫސް ބަޔާނެއްގައި ބުނީ، އެ މަޝްރޫއަކީ މާލެ ސަރަހައްދުގައި ކުރިމަތިވެފައިވާ ތަފާތު ދަތިތަކުން އަރައިގަތުމަށް ހިންގެމުންދާ ތަފާތު ތަރައްގީގެ މަޝްރޫއުތަކުގެ ބައެއް ކަމަށެވެ. އެގޮތުން އެއީ މާލޭ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް ބޮޑު ލުޔެއް ލިބި، ގިނަބައެއްގެ ދިރިއުޅުމުގެ ފެންވަރު ރަނގަޅު ކުރުން ހިމެނޭ ކަމަށް ބުނެފައިވެއެވެ.
އާބަންކޯއިން އިތުރަށް ބުނީ، ހުޅުމާލޭގައި މިހާރު ތަރައްގީ ކުރެވެމުންދާ އެހެން ފިޔަވަހިތަކެކޭވެސް އެއްފަދައިން ތިންވަނަ ފިޔަވަހީގައިވެސް ރައްޔިތުންނަށް ލުއިފަސޭހަވާނޭހެން ގިނަ ޚިދުމަތްތަކާއި ވަސީލަތްތައް އެންމެ އަދާހަމަ ބީދައަކުން ތަރައްގީކުރުމަށް ހަމަޖެހިފައިވާ ކަމަށެވެ. މިގޮތުން މަގުތަކާއި ބްރިޖްގެ އިތުރުން ހިތްގައިމު ޕާރކްތައް ހަދައި ކުޅިވަރާއި މުނިފޫހިފިލުވުމުގެ ހަރަކާތްތަކަށްވެސް ގިނަ ފުރުސަތުތަކެއް ލިބިގެންދާނެ ކަމަށް ބުނެފައިވެއެވެ.
ހުޅުމާލޭ ފޭސް 3 ގެ ބިން ހިއްކަން ފެށުން-- ފޮޓޯ/ އާބަންކޯ
އާބަންކޯއިން ބުނީ، ހުޅުމާލެ ފޭސް 3 ގެ އިތުރުން، ކުޑަގިރި، ތިލަފުށި، ގުޅިފަޅު އަދި ދިޔަނެރު ފަޅުގެ ތަފާތު މަޝްރޫއުތައް މިހާރުވެސް ކުރިއަށްދާ ކަމަށެވެ. އަދި މި މަޝްރޫޢުތަކަކީވެސް ބޯހިޔާވަހިކަމަށް ދިމާވެފައިވާ ދަތިތަކުގެ އިތުރުން، މި ސަރަހައްދުގައި ސިނާއީ އަދި މުނިފޫހިފިލުވުމުގެ ހަރަކާތްތަށް ކުރިއަށް ގެންދިއުމަށް ދިމާވާ ދަތިތަކަށްވެސް އެތައް ހައްލެއް ލިބިގެންދާނެ މަޝްރޫޢުތަކެއް ކަމަށެވެ.
Advertisement
This content is created and paid for by advertisers and does not involve Voice Journalists
