ރިޔާސީ އިންތިޚާބުގެ ދެވަނަ ބުރުގެ ރީރެޖިސްޓޭޝަން ލިސްޓަށް ހުޅުވާލި 48 އިރުތެރޭގައި 361 ޝަކުވާ ލިބިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
އެކޮމިޝަންގެ ނައިބު ރައީސް އިސްމާއިލް ޙަބީބް ކުރައްވައިފައިވާ ޓްވީޓެއްގައި ވިދާޅުވެފައިވަނީ ރިޔާސީ އިންތިޚާބު 2023 ގެ ދެވަނަ ބުރުގައި، ރީ-ރަޖިސްޓަރީ ކުރަން ހުށަހެޅި ފޯމުތަކުގެ ތެރެއިން ސައްޙަވީ 38763 ހުށަހެޅުނު ކަމަށާއި، ސައްޙަކަން ކަށަވަރު ނުވީ 11284 ހުށަހެޅުނު ކަމަށެވެ.
ރީ-ރަޖިސްޓަރީ ކުރަން ހުށަހެޅި ފޯމުތަކާ ގުޅޭގޮތުން، އިލެކްޝަންސް ކޮމިޝަނުން 48 ގަޑިއިރު ގެ ޝަކުވާގެ މުއްދަތެއް ހުޅުވާލުމުން، އެ ކޮމިޝަނަށް ވަނީ 361 ޝަކުވާ ލިބިފައި ކަމަށްވެސް ޙަބީބް ވަނީ ވިދާޅުވެފައެވެ.
ޙަބީބް ވިދާޅުވީ މައިގަނޑު ގޮތެއްގައި ޝަކުވާ ހުށައެޅިފައިވަނީ ބަލައި ނުގަތް ރީ-ރެޖިސްޓަރ ފޯމު ތަކާއި ގުޅިގެން ހުށައަޅައިފައިވާ ޝަކުވާތައް ކަމަށެވެ.
އެމީހާ އަށް ނޭނގި އެމީހާގެ ނަމުގައި ސައްޙަ ނޫން ފޯމު ހުށަހަޅައިގެން ލިބިފައިވަނީ ވަރަށް މަދު ޝަކުވާއެއް ކަމަށާއި، ލިބުނު ޝަކުވާތަކަށް އިލެކްޝަންސް ކޮމިޝަނުން ދަނީ ޖަވާބު ދެމުން ކަމަށްވެސް ޙަބީބު ވިދާޅުވިއެވެ.
"އިލެކްޝަންސް ކޮމިޝަނުން ލަފާކުރަނީ، ވޯޓުލާ މީހުންގެ ފައިނަލް ލިސްޓު މިއަދު އިޢުލާން ކުރަން. އެލިސްޓަކީ ދެން ބަދަލު ނުގެނެވޭނެ ފައިނަލް ލިސްޓު" ޙަބީބް ވިދާޅުވެފައިވެއެވެ.
ޙަބީބް އިތުރަށް ވިދާޅުވީ އިންތިޚާބުގެ ދެވަނަ ބުރުގައި ވޯޓް ލުމުގެ ހައްޤު ލިބިފައިވަނީ 282803 މީހުންނަށް ކަމަށެވެ.
Advertisement
This content is created and paid for by advertisers and does not involve Voice Journalists
