ރިޔާސީ އިންތިޚާބުގެ ދެވަނަ ބުރުގައި ވޯޓް ލެވޭ މީހުންގެ ދާއިމީ ލިސްޓު އިޢްލާނު ކޮށްފިއެވެ.

އިލެކްޝަންސް ކޮމިޝަނުން ވޯޓްލެވޭ މީހުންގެ ލިސްޓު އިޢުލާނު ކޮށްފައިވަނީ ރޭގެ ދަންވަރުގެ ވަގުތެއްގައެވެ.

އީސީ އިން ބުނެފައިވަނީ ދެވަނަ ބުރުގައި ވޯޓް ލުމުގެ ހައްޤު ލިބިފައިވަނީ 282803 މީހުންނަށް ކަމަށެވެ. އޭގެ ތެރޭގައި މުޅިން އަލަށް ވޯޓު ލެވޭ 408 ޒުވާނަކު ހިމެނެއެވެ.

ދެވަނަ ބުރުގެ ރީރެޖިސްޓޭޝަން ލިސްޓަށް ހުޅުވާލި 48 އިރުތެރޭގައި 361 ޝަކުވާ ލިބިފައިވާ ކަމަށް އީސީ އިން ވަނީ ބުނެފައެވެ. އެކޮމިޝަންގެ ނައިބު ރައީސް އިސްމާއިލް ޙަބީބް ވިދާޅުވެފައިވަނީ ރިޔާސީ އިންތިޚާބު 2023 ގެ ދެވަނަ ބުރުގައި، ރީ-ރަޖިސްޓަރީ ކުރަން ހުށަހެޅި ފޯމުތަކުގެ ތެރެއިން ސައްޙަވީ 38763 ހުށަހެޅުނު ކަމަށާއި، ސައްޙަކަން ކަށަވަރު ނުވީ 11284 ހުށަހެޅުނު ކަމަށެވެ.

ރީ-ރަޖިސްޓަރީ ކުރަން ހުށަހެޅި ފޯމުތަކާ ގުޅޭގޮތުން، އިލެކްޝަންސް ކޮމިޝަނުން 48 ގަޑިއިރު ގެ ޝަކުވާގެ މުއްދަތެއް ހުޅުވާލުމުން، އެ ކޮމިޝަނަށް ވަނީ 361 ޝަކުވާ ލިބިފައި ކަމަށްވެސް ޙަބީބް ވަނީ ވިދާޅުވެފައެވެ.

ޙަބީބް ވިދާޅުވީ މައިގަނޑު ގޮތެއްގައި ޝަކުވާ ހުށައެޅިފައިވަނީ ބަލައި ނުގަތް ރީ-ރެޖިސްޓަރ ފޯމު ތަކާއި ގުޅިގެން ހުށައަޅައިފައިވާ ޝަކުވާތައް ކަމަށެވެ.

މިއަންނަ ހޮނިހިރު ދުވަހު ރިޔާސީ އިންތިޚާބުގެ ދެވަނަ ބުރު ބޭއްވުމަށް ހަމަޖެހިފައިވާއިރު އީސީ އިން ބުނެފައިވަނީ ދެވަނަ ބުރުގެ ވޯޓް ކަރުދާސްތައް ޗާޕްކޮށް މިހާރު ނިމިފައިވާ ކަމަށެވެ.