ކުރީގެ ފޮރިން މިނިސްޓަރ އަދި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބް ރައީސްކަމުގެ މަގާމު އަދާކުރައްވަމުންދިޔަ ދުންޔާ މައުމޫން، ޕީޕީއެމްއަށް ސޮއިކުރައްވައިފިއެވެ.

މިހާރު ހުޅުމާލޭގައި ކުރިއަށްދާ ޑރ. މުހައްމަދު މުޢިއްޒު ގެ ކެންޕެއިން ޖަލްސާގެ ތެރެއިން ދުންޔާ ވަނީ ޕީޕީއެމްއަށް ސޮއި ކުރައްވައި، އެ ސޮއި ކުރެއްވި ފޯމު އިދިކޮޅު ކޯލިޝަނާއި ވަގުތީ ގޮތުން ހަވާލުވެވަޑައިގެންނެވި ޕީއެންސީގެ ރައީސް އަބްދުއްރަހީމް އަބްދުالله އާއި އިދިކޮޅު ކޯލިޝަންގެ ކެންޑިޑޭޓް ޑރ. މުއިއްޒަށް ހަވާލުކުރައްވާފައެވެ. 

ލމީގެ ކުރިން ޕީޕީއެމް އާއި ޑީއާރްޕީގެ އުޅުއްވި ދުންޔާ އަކީ ފާއިތުވި ސަރުކާރު ތަކުގެ އިސް އަދި މުހިންމު މަގާމުތައް އަދާ ކުރައްވާފައިވާ ސިޔާސީ ގޮތުން ފުންނާބު އުސް ކަނބަލެކެވެ. 

އެގޮތުން، އަދާކުރެއްވި މަގާމު ތަކުގެ ތެރޭގައި 2013 އިން 2016 އަށް ރާއްޖޭގެ ފޮރިން މިނިސްޓަރު ކަމާއި، 2012 އިން 2013 ފޮރިން މިނިސްޓްރީގެ ސްޓޭޓް މިނިސްޓަރު ކަމާއި، 2006 އިން 2008 އަށް ފޮރިން މިނިސްޓްރީގެ ޑެޕިއުޓީ މިނިސްޓަރުކަން ފާހަގަކޮށްލެވެެއެވެ.

ދުންޔާގެ އިތުރުން ކުރީގެ ރައީސް މައުމޫނު އަބްދުލްޤައްޔޫމް ގެ އަނެއް ދަރިކަލުން ޣައްސާން މައުމޫން އަކީވެސް ޕީޕީއެމްއަށް ނިސްބަތްވެވަޑައިގަންނަވާ އެ ޕާޓީގެ ނާއިބު ރައީސް ކަމުގެ މަގާމު ފުރުއްވަމުންދާ ބޭފުޅެކެވެ. ނަމަވެސް ރައީސް މައުމޫންގެ އަނެއް ދަރި ކަނބަލުން އަދި ދުންޔާގެ އެއްމާބަނޑު ޔުމްނާ މައުމޫން ހުންނެވީ އެމްޑީޕީީ ގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ފަޅީގައެވެ. ޔުމްނާ އަކީ މި ސަރުކާރުގެ ހެރިޓޭޖް މިނިސްޓަރު ވެސްމެއެވެ.