ނެދަރލޭންޑްގައި ކީރިތި ޤުރުއާނުގެ ކޮޕީއެއް ވީދާލި މައްސަލަ ދިވެހި ސަރުކާރުން ކުށްވެރިކޮށްފިއެވެ.
ދިވެހި ޚާރިޖިއްޔާއިން ނެރިފައިވާ ބަޔާނުގައި ބުނެފައިވަނީ މިމަހުގެ 23 ވަނަ ދުވަހު ނެދަރލޭންޑްގެ ވެރިރަށް ދަހޭގް ގައި ހުރި ބައެއް އިސްލާމީ ޤައުމުތަކުގެ އެމްބަސީތަކުގެ ކުރިމަތީގައި ހިންގި ކީރިތި ޤުރުއާން ވީދުމުގެ މައްސަލަ ހަރުކަށީ ޢިބާރާތުން ކުށްވެރި ކުރާ ކަމަށެވެ.
ދިވެހި ޚާރިޖިއްޔާއިން ބުނެފައިވަނީ ތަކުރާރުކޮށް ކުރަމުންމިދާ މިފަދަ ޢަމަލުތައް ހިންގުމަކީ ހިޔާލު ފާޅުކުރުމުގެ މިނިވަންކަމުގެ ނަމުގައި ކުރެވިދާނެ ކަންކަމުގެ ގޮތުގައި ޤަބޫލުނުކުރާ ކަމަށެވެ. އަދި މި ކަހަލަ ޢަމަލުތައް ހުއްޓުވުމަށް ދައުލަތްތަކުން ޤައުމީ ފެންވަރުގައި ޤާނޫނާއި ސިޔާސަތުތައް ކަނޑައަޅައި ތަންފީޒުކުރަން ޖެހޭ ކަމަށް ވެސް އެ ބަޔާނުގައި ބުނެފައިވެއެވެ.
މީގެ އިތުރުން މުސްލިމުންނާ ދެކޮޅަށް ނަފްރަތު އުފެއްދުމުގެ ގޮތުން ހިންގާ އެފަދަ ޢަމަލުތައް ތަކުރާރުކުރިޔަ ނުދިނުމަށް ބައިނަލް އަޤުވާމީ ޖަމާޢަތްތަކުން އަވަސް ފިޔަވަޅުތަކެއް އެޅުމަށް ވެސް ޚާރިޖިއްޔާއިން ވަނީ ގޮވާލައިފައެވެ.
ނެދަރލޭންޑްގައި ހުންނަ ތުރްކީގެ އެމްބަސީ ކުރިމަތީގައި ހިންގި މިޢަމަލާއި ގުޅިގެން އިސްލާމީ ޤައުމުތަކުން އަންނަނީ މިކަން ކުށްވެރި ކުރަމުންނެވެ. މިފަހަކަށް އައިސް މިފަދަ ޢަމަލުތައް ވަނީ ވަރަށް ބޮޑަށް އިތުރުވެފައެވެ.
Advertisement
This content is created and paid for by advertisers and does not involve Voice Journalists
