ރާއްޖޭގެ މަޝްހޫރު ވިޔަފާރި ވެރިޔާ އަދ ދ.މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދުގެ މޭސްތިރި ކަމުގެ ދަށުން ހިންގާ އެމްޑީއޭ އިން ރައީސް އިބްރާހިމް މުޙައްމަދު ޞާލިޙަށް ކުރި ތާއީދު އަނބުރާ ގެންގޮސްފިއެވެ.
އެމްޑީއޭ އިން މިރޭ ބޭއްވި ކައުންސިލް ބައްދަލުވުމެއްގައި އެމްޑީޕީ އާއި އެކު ހަދައިފައިވާ ކޯލިޝަން ރޫޅާލުމަށް އެޕާޓީގެ ކައުންސިލަށް، ކައުންސިލް މެމްބަރު މުޙައްމަދު އައްބާސް ހުށައެޅުއްވުމުން އެޕާޓީގެ ނައިބު ރައީސް އަލީ މަޢުރޫފް ވަނީ އެކަމަށް ތާއީދު ކުރައްވައިފައެވެ. މި ކައުންސިލް ބައްދަލުވުމުގެ ރިޔާސަތު ބެލެހެއްޓެވީ ސިޔާމެވެ.
މެންބަރު މުހައްމަދު އައްބާސްގެ ހުށަހެޅުން ފާސްވީ އެމްޑީއޭ ކައުންސިލް ބައްދަލުވުމުގައި ބައިވެރިވެވަޑައިގެންނެވި 35 މެމްބަރުންގެ ތެރެއިން 33 މެމްބަރުންގެ ވޯޓުންނެވެ. އެ ހުށަހެޅުމާ ދެކޮޅަށް އަދި ރައީސް އިބްރާހިމް މުހައްމަދު ސޯލިހަށް ތާއީދުކޮށް ވޯޓު ދެއްވާފައި ވަނީ އެންމެ ދެ މެމްބަރުންނެވެ.
މި ބައްދަލުވުމުގައި ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ވެސް ވަނީ ހުށަހަޅާފައެވެ. އެ ހުށަހެޅުން ހުށަހެޅީ ސިޔާމެވެ. ސިޔާމްގެ އެ ހުށަހެޅުމަށް ވޯޓަށް އެހުމުން ލިބިފައި ވަނީ އެންމެ ދެ ވޯޓު ކަމަށް އަލީ މައުރޫފް ވަނީ ވިދާޅުވެފައެވެ.
އެމްޑީއޭގެ ބައިވެރިވުން އިންތިޚާބުގެ ފުރަތަމަ ބުރުގެ ކެމްޕޭނުން ވަރަށް ބޮޑަށް ފެނިގެން ގޮސްފައިވާއިރު ދެވަނަ ބުރުގެ ކެމްޕޭނުން އެމްޑީއޭ ފެނުން ވަނީ ވަރަށް ބޮޑަށް މަދުވެފައެވެ.
އެމްޑީއޭގެ މި ނިންމުމާއި އެކު ރައީސް އިބްރާހިމް މުޙައްމަދު ޞާލިޙް އިންތިޚާބުގެ ދެވަނަ ބުރަށް ނުކުންނަވާނީ އެމްޑީޕީ އާއި ޢަދާލަތު ޕާޓީ ހިމެނޭ ކޯލިޝަނަކުންނެވެ.
Advertisement
This content is created and paid for by advertisers and does not involve Voice Journalists
