ވޯޓުލުން ކުރިއަށް ދާ ވަގުތު މާލޭގައި ބޮޑެތި އުޅަނޑުތައް ދުއްވުން ޓްރާންސްޕޯޓް މިނިސްޓްރީ އިން މަނާ ކޮށްފިއެވެ.

އެމިނިސްޓްރީ އިން ނެރެފައިވާ އިޢުލާނެއްގައި ބުނެފައިވަނީ ދެވަނަ ބުރުގެ ވޯޓުލުމުން ކުރިއަށްދާ ވަގުތު މާލޭގެ މަގުތަކުގައި ޓްރެފިކް ބާރުބޮޑުވެ، ވޯޓުލުމަށް ދާ މީހުންނަށާއި، ވޯޓުގެ އިދާރީ އަދި ސަލާމަތީ މަސައްކަތަށް ދަތިވުމުގެ ސަބަބުން، މަގުތަކުގައި ހަތަރު ފުރޮޅުލީ ބޮޑެތި އުޅަނދުފަހަރު ދުއްވުން މަނާކުރުމަށް ނިންމާފައިވާކަމަށެވެ.

ދުއްވުން މަނާ ކެޓަގަރީތަކުގައި ހިމެނެނީ "ސީ2"، "ސީ0"، "ޑީ"، "އީ" އަދި "ވީ"  ކެޓަގަރީގައި ހިމެނޭ އުޅަނދެވެ. އޭގެ ތެރޭގައި ހިމެނެނީ ބޮޑެތި ވޭން، ކާރު، މުދާ އުފުލުމަށް ބޭނުންކުރާ އުޅަނދާއި ކޮންސްޓްރަކްޝަން މަސައްކަތްކުރުމަށް ބޭނުންކުރާ އުޅަނދުފަހަރެވެ.

Advertisement

ހެނދުނު 6:00 ރޭގަނޑުގެ 8:00 އާއި ހަމައަށް އެކެޓަގަރީ ތަކުގެ އުޅަނޑުތައް ދުއްވުން މަނާ ކޮށްފައިވާއިރު، އުޞޫލާ ޚިލާފަށް ދުއްވާ އުޅަނދުތައް އެއްގަމު ދަތުރުފަތުރުގެ ޤާނޫނުގެ ދަށުން 750ރ. އިން ޖޫރިމަނާކުރާނެކަމަށް މިނިސްޓްރީން ބުނެފައިވެއެވެ.

އެ ކެޓަގަރީތަކުގައި ހިމެނޭ އުޅަނދުފަހަރުގެ ތެރެއިންވެސް ސަލާމަތީ ބާރުތަކުގެ އުޅަނދުތަކާއި ސަރުކާރުގެ އިދާރާތަކުގެ ޢާންމު ޚިދުމަތް ދިނުމަށް ބޭނުންކުރާ އުޅަނދުފަހަރު އެ ވަގުތުތަކުގައި ދުއްވުން މަނާ ނުވާނެ ކަމަށް މިނިސްޓްރީގެ އިޢުލާނުގައި ވެއެވެ.