ޢިރާޤުގެ އުތުރުގައި ކައިވެނީގެ ވަލީމާއެއްގައި އުފާފާޅު ކުރަމުން ދަނިކޮށް އަލިފާން ރޯވެ 100 މީހުން މަރުވެއްޖެއެވެ.
ޢިރާޤްގެ ނިންވޭހް ޕްރޮވިންސްގައި ކުރިއަށް ދިޔަ ކައިވެނީގެ ވަލީމާއެއްގައި ހަވާ އަރުވަން ބޭނުން ކުރި ބަޑިބޭހުގައި ރޯވެގެން ހިނގި މިހާދިސާގައި މަރުވި މީހުންގެ ޢަދަދު 100 އަށްވުރެ ގިނަ ވާނެ ކަމަށް ވަނީ ލަފާކޮށްފައެވެ.
މި ހާދިސާގައި ވަލީމާގައި ބައިވެރިވި ގިނަ ބަޔަކަށް އެކި ވަރުގެ އަނިޔާ ލިބިފައިވާއިރު ކައިވެނި ކުރި ދެމަފިރިންނަށްވެސް އެކި ވަރުގެ އަނިޔާވަނީ ލިބިފައެވެ.
މިހާދިސާ އާއި ގުޅިގެން ގިނަ ބަޔަކު ހައްޔަރު ކޮށްފައިވެއެވެ. ޢިރާޤްގެ ހެލްތް މިނިސްޓްރީ އިން ބުނެފައިވަނީ އަލިފާން ރޯވުމުގެ ސަބަބުން ބޮޑެތި އަނިޔާތައް ލިބުނު މީހުން ފަރުވާއަށް ހޮސްޕިޓަލް ގައި އެނދުމަތި ކުރެވިފައިވާކަމަށެވެ.
ދުނިޔޭގެ އެކި ޤައުމުތަކުން އަންނަނީ މިހިތްދަތި ވަގުތުގައި އެޤައުމުގެ ރައްޔިތުންނަށް ތައުޒިޔާ ކިޔަމުންނެވެ.
ހާދިސާގައި މަރުވި މީހުންގެ އާއިލާތަކުން އެމީހުންނަށް ފަހުގެ ސަލާމް ކުރުމަށް މަގުތަކަށް ދަނީ ނުކުންނަމުންނެވެ.
މިކަމާއި ގުޅިގެން ޢިރާޤުގެ ރައީސް ވަނީ އެކަން ތަހްޤީޤު ކުރުމަށް ކަމާއި ބެހޭ ފަރާތްތަކަށް އަންގައިފައެވެ.
Advertisement
This content is created and paid for by advertisers and does not involve Voice Journalists
