ދިވެހި ރާއްޖޭގެ ދަރަނި މިހާރު 146 އަށް އަރާފައިވާއިރު، އެ ދަރަނީގެ ދެބައިކުޅަ އެއްބައި ނަގާފައިވަނީ ވަކި ގައުމަކުން ކަމަށް އިދިކޮޅު ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ދެވަނަ ބުރުގެ ކެމްޕެއިންނަށް މިހާރު އަތޮޅު ތެރޭގެ ރަށްތަކަށް ކުރައްވަމުން ގެންދަވާ ދަތުރުފުޅުގައި އައްޑޫ ސިޓީގެ ހުޅުދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަ ދައްކަވަމުން މުޢިއްޒު ވަނީ، މިމަހު 30 ވަނަ ދުވަހު އެންމެންލާ ވޯޓަކީ ގައުމީ ވިސްނުމުގައި ލާ ވޯޓެއް ކަމަށް ހެދުމަށް އެދި ލައްވާފައެވެ. 

އެހެނީ، މިއަދު މި ޤައުމުގައި މިނިވަންކަމުގެ އެއްވެސް ޔަގީންކަމެއް ނެތް ކަމަށާ، ޤައުމުގެ ކަންކަމުގައި ބަސްބުނުމުގެ އަމިއްލަވަންތަ ކަމެއްވެސް ނެތް ކަމަށެވެ.

މިއާއެކު މުޢިއްޒު ވިދާޅުވީ އެމަނިކުފާނަށް އިތުބާރުކުރައްވާ އިންތިޚާބު ކޮށްދެއްވައިފިނަމަ އެންމެ ފުރަތަަމަ ކަމަށްވެސް މި ގައުމުގެ މިނިވަންކަން ޔަގީންކޮށްދެއްވާނެ ކަމަށެވެ. އެއަށްފަހު ޤައުމުގެ އިގްތިޞާދު މިނިވަންކޮށްދެއްވާނެ ކަމަށް އޭނާ ވިދާޅުވި އެވެ. 

މީގެ އިތުރުން މުޢިއްޒު ވަނީ، އައްޑޫ ސިޓީއަށް އެމަނިކުފާނު ވެވަޑައިގެންނެވި ވަޢުދުތައް ފުއްްދަވާނެ ކަމުގެ ޔަގީންކަންވެސް ދެއްވާފައެވެ.