ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާންގެ ޖަލު ބަންދުގެ އިތުރުކޮށް، ކުރިން ހުންނެވި ޖަލުން އެހެން ޖަލަކަށް ބަދަލުކޮށްފިއެވެ.

ޢިމްރާން ޚާން ބަދަލުކޮށްފައިވަނީ އިސްލާމްއާބާދާއި ކައިރި ހިސާބެއްގައި ހުންނަ ޖަލަކަށް ކަމަށް އަލްޖަޒީރާގައި ބުނެފައުވެއެވެ. ޢިމްރާން ޚާންގެ ޖަލު ބަންދުގެ މުއްދަތު ދެހަފްތާއަށް އިތުރުކޮށްފައިވަނީ ދައުލަތުގެ ސިއްރުތަކަކާއި ގުޅޭ މައްސަލައަކާއި ގުޅިގެން ކަމަށް ކޯޓުން ބުނެފިއެވެ.

އުމުރުން 70 އަހަރުގެ ޢިމްރާން ޚާން ބަދަލުކޮށްފައިވަނީ ރަވާލްޕިންޑީ ސިޓީގައި ހުންނަ އަދިއާލާ ޖަލަށެވެ. އަންގާރަ ދުވަހުގެރޭ ޢިމްރާން އެޖަލަށް ބަދަލުކޮށްފައިވަނީ 3ހަފްތާގެ މުއްދަތެއް އަޓޮކް ޖަލުގައި ހޭދަކުރުމަށް ފަހުގައެވެ. ޢިމްރާން ޚާން ޖަލަށް ލައިފައިވަނީ ކޮރަޕްޝަނާއި ގުޅޭ މައްސަލަތަކެއްގެ ތުހުމަތުތަކެއްގައެވެ.

Advertisement

އޮގަސްޓު މަހު ކުރި ޖަލު ޙުކުމެއްގައި ޢިމްރާން ޚާން ޖަލުގައި ބަންދު ކޮށްފައި ވާއިރު، އެޤައުމުގެ ކަމާއި ބެހޭ ފަރާތްތަކުން ދަނީ ދައުލަތުގެ ސިއްރުތަކާއި ގުޅޭ މައްސަލަ ތަހްޤީޤް ކުރަމުންނެވެ. ނަމަވެސް ތަކުރާރުކޮށް ވިދާޅުވަމުން ދަނީ އެމައްސަލައަކީ އެމެރިކާ އާއި ޕާކިސްތާނާއި ދެމެދު ހިނގި ޑިޕްލޮމެޓިކް މުއާމަލާތްތަކާ ގުޅުން ހުރި މައްސަލައެއް ކަމަށާއި އެއީ އެމެރިކާއިން އޭނާގެ ސަރުކާރު ވައްޓާލަން ރޭވި ރޭވުމުގެ ބައެއް ކަމަށެވެ.

ނަމަވެސް ޕާކިސްތާނާއި އެމެރިކާ އިން ވަނީ މިވާހަކަތައް ދޮގުކޮށްފައެވެ.

ޢިމްރާން ޚާން ހުންނެވި ޖަލުން އެހެން ޖަލަކަށް ބަދަލުކޮށްފައިވަނީ އޭނާގެ ވަކީލުންގެ އެދުމުގެ މަތިންނެވެ. ޢިމްރާންގެ ވަކީލުން ތުހުމަތު ކޮށްފައިވަނީ އަޓޮކް ޖަލުގައި ހުންނެވި އިރު ޢިމްރާން ޚާންގެ ހަށިކޮޅު ވަނީ ނުރައްކަލެއްގެ ތެރޭގައި ކަމަށެވެ.