މާދަމާ އޮންނަ ރިޔާސީ އިންތިހާބުގެ ދެވަނަ ބުރުގައި ވޯޓުލާ މީހުން ވޯޓުލީކަމުގެ ނިޝާން ވައަތުގެ މެދު އިނގިލީގައި ޖަހަން އިލެކްޝަން ކޮމިޝަން (އީސީ) އިން ކުރިން ނިންމި ނިންމުން ބަދަލުކޮށް، ވައަތުގެ ކަށި އިނގިލީގައި ފާހަގަ ޖަހަން އެ ކޮމިޝަނުން ނިންމައިފިއެވެ.
މިމަހުގެ ނުވަވަނަ ދުވަހު ބޭއްވި އިންތިހާބުގެ ފުރަތަމަ ބުރުގައި މި ފާހަގަ ޖަހާފައި ވަނީ ވައަތުގެ ޝަހާދަތް އިނގިލީގަ އެވެ. އިނގިލީގެ ނިޔަފައްޗާއި އެއްކޮށް ދިގަށް މާކަރަކުން ޖަހާ މި ފާހަގަ ވަރަށް ގިނަ ދުވަހު ނުފިލާ ހުރެ އެވެ.
އެހެންކަމުން އިއްޔެ ހެނދުނު އިލެކްޝަން ކޮމިޝަނުން އިއުލާން ކުރީ ދެވަނަ ބުރުގައި ވައަތުގެ މެދު އިނގިލީގައި ފާހަގައެއް ޖެހުމަށެވެ. އެކަމާ ގުޅިގެން ގިނަ ބައެއްގެ ފާޑު ކިއުން އެ ކޮމިޝަނަށް އަމާޒުވިއެވެ.
އެއާއެކު ފަހުން، ރޭގެ ވަގުތެއްގައި އީސީން ވަނީ އެ ނިންމުން ބަދަލުކޮށް، ދެވަނަ ބުރުގަައި ފާހަގަ ޖަހާނީ ވާއަތުގެ ކަށި އިނގިލީގައި ކަމަަށް ބުނެފައެވެ.
އިންތިހާބުގެ ދެވަނަ ބުރުގައި ޖުމްލަ 282803 މީހުންނަށް ވޯޓް ލެވޭނެ އެވެ. ދެވަނަ ބުރުގައި އަލަށް 18 އަހަރު ފުރުނު 408 މީހުން ވޯޓް ލާނެ އެވެ. ދެވަނަ ބުރުގައި 586 ވޯޓްފޮށި ބަހައްޓާ އިރު، ރާއްޖެއިން ބޭރުގައި ވޯޓްފޮށި ބަހައްޓަނީ ފަސް ގައުމެއްގަ އެވެ. އެއީ އިންޑިއާ އާއި ސްރީލަންކާ އާއި މެލޭޝިއާގެ އިތުރުން ޔޫއޭއީ އަދި އިނގިރޭސިވިލާތުގައެވެ.
Advertisement
This content is created and paid for by advertisers and does not involve Voice Journalists
