ފާހަގަ ޖަހައިފައި ވޯޓު ކަރުދާސް ދޫކުރުމުން ކަމަށްބުނެ ލ ފޮނަދޫގެ ވޯޓް ލާ މަރުކަޒުގައި މަސްލަޙަތު ގެއްލި އަޑުގަދަ ކުރަން ފަށައިފިއެވެ.

ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވެފައިވަނީ ފޮނަދޫގެ 3 ނަންބަރު ވޯޓު ފޮށީގައި ދޫކުރި 3 ކަރުދާހެއްގައި ކުރަހާފައިވާ މައްސަލައެއްވަނީ ފެންމަތި ވެފައި ވާކަމަށެވެ. އަދި މި 3 ކަރުދާސް ދޫކޮށްފައިވަނީ އިދިކޮޅަށް ވޯޓް ދޭނެ ކަން ޔަޤީންވާ ތިން ފަރާތަކަށް ކަމަށްވެސް ސިރާޖު ވިދާޅުވެފައިވެއެވެ.

ސިރާޖް ވިދާޅުވެފައިވަނީ ވޯޓު ބާތިލު ކުރަން ކުރާ މިފަދަކަންތައް އެހެން ފޮށިތަކުގައި ކުރިޔަށްދޭތޯ ފާރަވެރިވުމަށް އެދެލައްވާ ކަމަށެވެ.

މިކަމާއި ގުޅިގެން ފޮނަދޫގެ ވޯޓްލާ މަރުކަޒުގައި އަޑު ގަދަކޮށް އެކަމާއި ދެކޮޅަށް ޚިޔާލު ފާޅުކޮށްފައިވެއެވެ.

މިކަމާއި ގުޅިގެން ފުލުހުން ބުނީ، ލ. ފޮނަދޫގައި ވޯޓުލާ މަރުކަޒުގެ އޮފިޝަލަކު ވޯޓު ކަރުދާހުގައި ކުރަހާފައި ދޭކަމުގެ ޝަކުވާ ފުލުހުންނަށް ހުށަހަޅާފައިވާ ކަމަށެވެ. އަދި މިކަމާ ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުން ކަމަށެވެ.