އިގިރޭސި ޕްރެމިއާ ލީގުގައި ހޮނިހިރު ދުވަހުގެ އަމިއްލަ ދަނޑުގައި ޗެންޕިއަން މެންޗެސްޓާ ސިޓީ އާއި ދެކޮޅަށް ކުޅުނު މެޗު 2-1 ގެ ނަތީޖާއަކުން ވުލްވްސް އިން ކާމިޔާބުކޮށްފި އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ސިޓީ އިން މެޗު ޑޮމިނޭޓުކުރި ނަމަވެސް މި މެޗުގައި ފުރަތަަމަ ލަނޑުޖަހައި ކުރިހޯދީ ވުލްވްސް އިންނެވެ. މިއީ ފުރަތަމަ ހާފުގެ 13 ވަނަ މިނެޓުގައި ސިޓީގެ ޕޯޗުގަލް ޑިފެންޑަރު ރުބެން ޑިއާޒް އަތުން ބައިކޮޅަށް ވަން ލަނޑެކެވެ.

ފުރަތަަމަ ހާފުގައި ސިޓީގެ ފޯވާޑް އެރްލިންގް ހާލަންޑް އައީ ނޭތަން އަކޭގެ އިތުރުން ފިލް ފޮޑެން އަށް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުންނުކުރެވިފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ވުލްވްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި މެންޗެސްޓާ ސިޓީ އިން ވަނީ އެޓީމުގެ ކުޅުން އިތުރަށް ރަގަޅުކޮށް އެޓޭކުތައް ވަރުގަދަ ކުރި އިރު، ދެވަނަ ހާފުގެ 52 ވަނަ މިނެޓުގައި ހާލަންޑްއަށް ވަނީ ނަތީޖާ އެއްވަރުކޮށްލަން ލިބުނު ހުސް ފުރުސަތުގެ ބޭނުން ނުކުރެވިފައެވެ  ނަމަވެސް އޭގެ ހަ މިނެޓް ފަހުން ވުލްވްސްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން ސިޓީގެ އާޖެންޓީނާ ފޯވާޑް ޖޫލިއަން އަލްވަރޭޒް ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ.

މިމެޗުން ވުލްވްސް މޮޅުވި ލަނޑު ދެވަނަ ހާފުގެ 66 ވަނަ މިނެޓުގައި ކާމިޔާބުކޮށްދިނީ އެޓީމުގެ ސައުތު ކޮރެއާ ފޯވާޑް ހީ ޗަންގް ހުވާން އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ވުލްވްސް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 7 މެޗުން ލިބުނު 7 ޕޮއިންޓާއެކު ވުލްވްސް މިވަގުތު އޮތީ ލީގު ތާވަލްގެ 13 ވަނައިގައެވެ .