އިއްޔެ ނިމިގެން ދިޔަ ރިޔާސީ އިންތިހާބުގެ ދެވަނަ ބުރުގެ ވޯޓުލުމުގެ އެންމެހައި ކަންތައްތަކެއް ޖުމުލަކޮށް ކުރިއަށް ދިޔައީ އަމާންކަމާއި އޮމާންކަމާއެކު ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.ރިޔާސީ އިންތިހާބުގެ ދެވަނަބުރާއި ގުޅިގެން ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވީ އިންތިހާބުގެ ނަތީޖާއަށް ބަދަލު އަންނަވަރުގެ ކަމެއް އެ ކޮމިޝަންގެ ޝަކުވާ ބިއުރޯއަށް ހުށަަހަޅާފައި ނުވާ ކަމަށެވެ.
އެހެން ނަމަވެސް ލ. ފޮނަދޫއާއި އަދި ގދ. ވާދޫގެ ވޯޓު ފޮށި ސަރަހައްދުގައި ހިނގައިދިޔަ ހަމަ ނުޖެހުމަށް އިޝާރާތްކުރައްވައި ހަބީބް ވިދާޅުވީ، ފޮނަދޫގެ ފޮއްޓެއްގައި ދޫކުރި ވޯޓު ކަރުދާސްތަކުގައި އިތުރު މާކެއް ހުރި ކަމަށާއި އަދި ފަހުން ނުލާ ހުރި ވޯޓު ކަރުދާސްތަކުގެ ތެރެއިން ވެސް ތިން ކަރުދާހެއްގައި އެފަދަ ފާހަގައެއް ހުރިކަން ފާހަގަ ކުރެވިފައިވާކަމަށެވެ.
ހަމަ އެހެންމެ ވާދޫގައި ވޯޓު ފޮށި ބަންދުކުރަން ފަސް ވަރަަކަށް މިނެޓެއް ވީތަނާ ފޮށި ފަޅާލިކަން ހަބީބް ފާހަގަ ކުރެއްވިއެވެ.
އެ އޮފިޝަލު ފަހުން ވަނީ އެހެން މަސްއޫލިއްޔަތެއް ވެސް ހަވާލުކޮށްފައެެވެ.
އެހެންވެ ފަހުން އެ ފޮށީ ބަންދުކޮށް އާ ފޮއްޓަކަަށް ވޯޓު ލުމުގެ މަސައްކަތަ ފެށި ކަމަށާއި އަދި ވޯޓު ދޫކުރާ މީހާގެ އަތުގައި ގަލަަމެއްވެސް އަދި އަނގޮޓިއެއްވެސް ނޯންނާނެ ކަމަށް ވިދާޅުވިއެވެ. އަދި އޮފިޝަލާއި މެދު ފުރިހަމަ ޔަގީންކަން އެބަ އޮތް ކަމަށްވެސް ވިދާޅުވިއެވެ.
މީގެ އިތުރުން ހަބީބް ވިދާޅުވީ ފޮށި ފަޅާލި މީހާ އެކަން ކުރީ އައިޑީ ކާޑުގެ މައްސަލައަކާ ހެދި ރުޅި އައިސްގެން ކަމަށެވެ. އެގޮތުން ދެ ގޮތަކަށް މައުލޫމާތު މިހާތަނަށް ލިބިފައިވާ ކަމަށްވެސް ވިދާޅުވިއެވެ.
އެގޮތުން މީހަކު އޭނާގެ އައިޑީ ކާޑު ފޮރުވީ ކަމަށާއި ނޫނީ އޭނާގެ އައިޑީ ކާޑު ހަދައިދޭން ޖެހޭ މީހުން އެ ކާޑު ހަދައި ނުދިން ކަމަށް އަޑު ފެތުރިފައިވާ ކަމަށް ވިދާޅުވިއެވެ.އިންތިހާބީ މަރުކަޒުތަކުގައި ހިނގި ކުދި ކުދި ކަންކަމާއި ގުޅިގެން އިއްޔެ 14 މީހަކު ވަނީ ފުލުހުންގެ ބެލުމުގެދަށަށް ގެންދެވިފައެވެ.
Advertisement
This content is created and paid for by advertisers and does not involve Voice Journalists
