ބިންވެރިޔާ ސްކީމުގެ ދަށުން މާލޭގެ ރައްޔިތުންނަށް ދޫކުރި ގޯތީގެ ރަޖިސްޓްރީ ދެން ހަވާލުކުރާނީ ސީއެޗްއެސްއީ ކުރިން ހިންގި އިމާރާތުން ކަމަށް ހައުސިން މިނިސްޓްރީން ބުނެފިއެވެ.

ހައުސިންގް މިނިސްޓްރީން ކުރި އިއުލާނެއްގައި ބުނެފައި ވަނީ އޮކްޓޯބަރު 3 ވާ އަންގާރަ ދުވަހުން ފެށިގެން ގޯތީގެ ރަޖިސްޓްރީ ދޫކުރުން ކުރިއަށް ގެންދިއުމަށް ހަމަޖެހިފައި ވަނީ ކުރީގެ ސީއެޗްއެސްއީ އިމާރާތުގައި ކަމަށެވެ. މީގެ ކުރިން ގޯތީގެ ރަޖިސްޓްރީ ދޫކޮށްފައި ވަނީ ހުޅުމާލޭ ސިންތަޓިކް ޓްރެކުގަ އެވެ.

ބިންވެރިޔާ ސްކީމްގެ ދަށުން ގޯއްޗަށް އެދި ހުށައެޅުމަށް ހުޅުވާލުމުން 15،164 ފޯމު ހުށަހަޅާފައިވާއިރު ގޯތި ލިބޭ މީހުންގެ ދާއިމީ ލިސްޓުގައި 18,955 މީހުން ހިމެނެއެވެ. 

އެ މީހުންނަށް ހުޅުމާލެ އިން 1،351 ގޯތި ދޫކުރަން ނިންމާފައިވާއިރު، ގުޅީފަޅުން 2،218 ގޯތި އަދި ގިރާވަރުފަޅުން 5،432 ގޯތި ދޫކުރަން ނިންމާފައި ވެއެވެ. މީގެ ތެރެއިން ހުޅުމާލެ އިން ދޫކުރާ ގޯތިތައް ދޫކުރާނީ ހުޅުމާލޭ ދެވަނަ ފިޔަވަހިންނެވެ.

'ބިންވެރިޔާ' ސްކީމުގެ ދަށުން މާލެ ސަރަހައްދުން ގޯތި ލިބުނު ފަރާތްތަކަށް ގޯތީގެ ރަޖިސްޓްރީ ހަވާލުކުރަން ފެށީ މިދިޔަ އޮގަސްޓް 27 ވަނަ ދުވަހު އެވެ.

ދާދިފަހުން ސަރުކާރުން ވަނީ އުތުރު ތިލަފަޅުންވެސް 4،000 ގޯތި ދޫކުރަން ނިންމައި، 'ބިންވެރިޔާ' ސްކީމާއި 'ގެދޮރުވެރިޔާ' ސްކީމްގެ ދަށުން ގޯއްޗާއި ފްލެޓަށް ކުރިމަތިލުމަށް ހުޅުވާލާފަ އެވެ. އެ ފުރުސަތު ހުޅުވާލާފައި އަންނަ މަހުގެ 24 ވަނަ ދުވަހާ ހަމައަށެވެ.