އޭއެފްސީ ޗެންޕިއަންސް ލީގް ގްރޫޕް އީގައި ހޯމަދުވަހުގެ ރޭ 3-1 ގެ ނަތީޖާއަކުން އުޒްބެކިސްތާނުގެ އިސްތިކްލޯލް ބަލިކޮށް ގުރޫޕްގެ އެއްވަނައިގައި ސައުދީ ޕްރޮފެޝަނަލް ލީގުގެ އަލް ނަސްރު އިން ހަމަޖެހިލައިފި އެވެ.
އަލް ނަސްރުގެ ދަނޑުގައި ކުޅެވުނު މިމެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ އެޓީމުން މެޗު ޑޮމިނޭޓުކުރި އިރު މިހާފުގައި އަލް ނަސްރު އިން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމަށް ލިބުނު ފުރުސަތުތަކުގެ ބޭނުން ނުކުރެވި ދިޔައިރު، މިހާފުގައި އިސްތިކްލޯލް އިން އުފެއްދި ހަމައެކަނި ނުރައްކާތެރި ހަމަލާގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.
މިލަނޑު ފުރަތަމަ ހާފުގެ 44 ވަނަ މިނެޓުގައި އެޓީމަށް ކާމިޔާބުކޮށްދިނީ އައިވަރީ ކޯސްޓުގެ ފޯވާޑް ސެނިން ސެބާއީ އެވެ. މިއީ އެޓީމުގެ ސާބިއާ ފޯވާޑް ޒެނިސް ބެގެނޮވިކް ތަނަވަސްކޮށްދިން ފުރުސަތެއްގައި ބޯޅައާއެކު އަލް ނަސްރުގެ ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.
މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިސްތިކްލޯލް ކުރީގައި އޮވެގެންނެވެ.
މެޗުގެ ދެވަަނަ ހާފުގައި އަލް ނަސްރުން އެޓީމުގެ އެޓޭކުތައް އިތުރަށް ވަރުގަދަކުރި އިރު އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 66 ވަނަ މިނެޓުގައި ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ ޔޫއެފާ ޗެންޕިއަންސް ލީގުގެ ތާރީޚްގައި އެންމެ ގިނަ ލަނޑުޖެހި ކުޅުންތެރިޔާގެ ރެކޯޑު އޮންނަ ރޮނާލްޑޯ އޭއެފްސީ ޗެންޕިްއަންސް ލީގުގައި ކާމިޔާބުކުރި ފުރަތަމަ ލަނޑެވެ.
މިމެޗުގައި އަލް ނަސްރު އިން ފުރަތަަމަ ފަހަރަށް ލީޑު ހޯދި ލަނޑު ފަހުހާފުގެ 72 ވަނަ މިނެޓުގައި އައިމަން ޔަހްޔާ ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އެޓީމުގެ ބްރެޒިލް ފޯވާޑް އެންޑަސަން ޓަލިސްކާ ކާމިޔާބުކޮށްދިންއިރު، އޭގެ ފަސް މިނެޓު ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ ވެސް ޓަލިސްކާ އެވެ.
މީގެއިތުރުންވެސް މިހާފުގައި އަލް ނަސްރުގެ ފަރާތުން ނުރައްކާތެރި ގިނަ ހަމަލާތަކެއް ފެނިގެންދިޔަ އިރު، ކައުންޓާ އެޓޭކުތަކުގައި އިސްތިކްލޯލް އިން ވެސް ރަގަޅު ފުރުސަތުތަކެއް ތަނަވަސްކުރި އެވެ.
މިމެޗުން ލިބުނު ތިން ޕޮއިންޓާއެކު ކުޅުނު ދެމެޗުން ވެސް މޮޅުވެ ގްރޫޕްގެ އެއްވަނައިގައި މިވަގުތު އޮތީ އަލް ނަސްރު އެވެ. އަދި މިމެޗުން ބަލިވި އިސްތިކްލޯލް ކުޅުނު ދެ މެޗުން ލިބުނު އެއް ޕޮއިންޓާއެކު އެޓީމު މިވަގުތު އޮތީ ގްރޫޕް އީގެ ފުލުގައެވެ.
Advertisement
This content is created and paid for by advertisers and does not involve Voice Journalists
