ކޮރަޕްޝަންގެ ކުއްލި މައްސަލަތަކެއް އުފެއްދުމަށް މަސައްކަތް ތަކެއް ބަޔަކު އެބަ ކުރާ ކަމަށާއި އޭސީސީ އޮތީ އެކަމަށް ފާރަވެރިވެގެން ކަމަށް އެކޮމިޝަނުން ބުނެފިއެވެ.

އެންޓި ކޮރަޕްޝަން ކޮމިޝަން (އޭސީސީ) އިން މިހެން ބުނެފައިވަނީ އެކޮމިޝަނުން ނެރުނު ނޫސް ބަޔާނެއްގައެވެ.

އެކޮމިޝަނުން ބުނެފައިވަނީ އިންތިޚާބު ނިމި، ވެރިކަން ހިންގުމުގެ ބާރާ، އައު ސަރުކާރުން ހަވާލުވުމުގެ ވަގުތު ކައިރިވަމުންދާ މި ދަނޑިވަޅުގައި، ބައެއް ފަރާތްތަކުން ކޮރަޕްޝަނަށް މަގުފަހިވާ ގޮތަށް ކުއްލި ކަންތައްތަކެއް ކުރުމަށް ނިންމަމުން ގެންދާކަމުގެ ގިނަ ޝަކުވާތަކެއް ކޮމިޝަނަށް ލިބެމުންދާ ކަމަށެވެ. އަދި މިކަމާއި ގުޅިގެން ސަރުކާރު އޮފީސްތަކާއި، ދައުލަތުގެ އިދާރާތަކާއި، މުއައްސަސާތަކާއި، ސަރުކާރުގެ އަދި ސަރުކާރު ހިއްސާވާ ކުންފުނިތަކުން ޢަމަލުކުރާނެ ގޮތްތަކެއް އަންގާ ކަމަށް އެނޫސް ބަޔާނުގައި ބުނެފައިވެއެވެ.

Advertisement

ސަރުކާރުގެ މުއައްސަސާތަކުން ޢަމަލު ކުރުމަށް އެކޮމިޝަނުން އަންގައިގައި ފައިވާ ގޮތް ތަކުގެ ތެރޭގައި މުޅިން އައު ޕްރޮޖެކްޓެއް ނުފެށުމާއި، ޚަރަދު ކުރުމުގައި ކޮރަޕްޝަނަށް މަގުފަހިވެދާނެ ގޮތްތަކަށް އަމަލުނުކުރުމަށާއި، ކުރަންޖެހޭ ޚަރަދުތައް ފިޔަވައި، އަލަށް ކަންކަން ނިންމައިގެން ހަރަދުތައް ނުކުރުން ހިމެނެއެވެ.

މީގެ އިތުރުން ކުރިން ބަޖެޓްކޮށްފައިނުވާ ނުވަތަ ކުރިން ޕްލޭންކޮށްފައިނުވާ އައު ޕްރޮޖެކްޓްތަކުގެ އެއްބަސްވުންތަކުގައި ސޮއި ނުކުރުމާއި، ނިންމާ ނިންމުމެއްގެ ސަބަބުން ކޮރަޕްޝަނުގެ ޢަމަލަކަށް މަގުފަހިވާ ގޮތަކަށް ކަމެއް މެދުވެރިވެދާނެ އިހުތިމާލު އޮންނަ ނަމަ އެފަދަ ނިންމުންތައް ނުނިންމުން ހިމެނެއެވެ.

ހަމަ މިއާއި އެކު ލިޔެކިޔުން ރައްކާތެރިކަމާއެކު ބެލެހެއްޓުމާއެކު އަދި ފައިސާއާއި، ވިޔަފާރިއާއި މުއާމަލާތްތަކާ ގުޅުންހުރި އެއްވެސް ލިޔެކިޔުމެއް ނައްތައިނުލުމަށް އަންގައިފައިވެއެވެ.

އޭސީސީއިން ބުނެފައިވަނީ މިކަންކަމަށް އޮފީސްތަކާއި، އިދާރާތަކާއި، ކުންފުނިތައް އަދި މުއައްސަސާތަކުގެ ޒިންމާދާރު މަގާމުތަކުގައި ތިއްބެވި ފަރާތްތަކުން ސަމާލުކަން ދެއްވުން އެދޭ ކަމަށެވެ. އަދި މި ދަނޑިވަޅުގައި އިސްވެދެންނެވުނު ފަދަ ޢަަމަލެއް ހިނގާކަމުގެ މައުލޫމާތު ލިބިއްޖެނަމަ އެ މައުލޫމާތު ކޮމިޝަނާއި ހިއްސާކޮށްދިނުމަށް އިލްތިމާސްކޮށްފައިވެއެވެ.

އޭސީސީ އިން ބުނީ އެ ކޮމިޝަނުން މި ގެންދަނީ އެފަދަ ކަންކަމަށް ފާރަވެރިވެ، ތަހުގީގު ކުރަންޖެހޭ ކަންކަން ދެނެގަނެ ފިޔަވަޅު އަޅަމުން ކަމަށެވެ. އޭސީސީން އިތުރަށް ބުނެފައިވަނީ އެފަދަ ޢަމަލުތައް ހުއްޓުވައި އަޅަންޖެހޭ ފިޔަވަޅުތައް އަޅާނެކަމުގެ ޔަޤީންކަން ދިވެހި ރައްޔިތުންނަށް އަރުވާކަމަށެވެ.