މި މަހުގެ 30 ވަނަ ދުވަހުގެ ކުރިން ވެރިކަމުގެ ނިޒާމު ބަދަލުކުރުމާއި ގުޅޭގޮތުން ދަ ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބު ހުށަހަޅުއްވާފައިވާ ގަރާރު ފާސްކުރުމުގައި މަޖިލީހުން އަމަލުކޮށްފައިވާ ގޮތާއި މެދު މެމްބަރުން ލަދުގަންނަން ޖެހޭކަމަށް މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ވިދާޅުވެއްޖެ އެވެ. 

ހިސާން ހުސެއިން މިފަދައިން ވިދާޅުވެފައި ވަނީ ނިޒާމީ ވޯޓު ގަރާރާއި ގުޅޭގޮތުން އިލެކްޝަންސް ކޮމިޝަނުން މަޖިލީހަށް ހުށައަޅާފައިވާ ސިޓީއާއި ގުޅިގެން މިއަދުގެ ޖަލްސާގައި ވާހަކަދައްކަވަމުން ނެވެ. 

ނިޒާމީ ވޯޓު ގަރާރާއި ގުޅޭގޮތުން އީސީން މަޖިލީހަށް ހުށައެޅި ސިޓީގައި ބުނެފައިވަނީ، އެ ގަރާރާއި ގުޅިގެން ސާފުކުރަން ޖެހޭ މުހިންމު ކަންތައްތަކެއް އަދިވެސް ހުރި ކަމަށެވެ.

އެގޮތުން ވެރިކަމުގެ ނިޒާމާއި ގުޅޭގޮތުން ރައްޔިތުންގެ ވޯޓަކަށް އަހާއިރު، ފެންނަ ނުފެންނަ ވޯޓަކަށް އަހަންވީ ސުވާލުގެ އިބާރާތް ވެސް ސާފުނުވާކަމަށް އީސީން ވަނީ ބުނެފައެވެ. އަދި އެފަދަ އިންތިޚާބަކާއި ގުޅޭގޮތުން ރައްޔިތުން ހޭލުންތެރިކުރުމަށް އެކަށީގެންވާ މައުލޫމާތުތައް ފޯރުކޮށްދޭން ޖެހޭއިރު، އެ މައުލޫމާތު ކަރުދާސް ވެސް އޮންނަންވާނެކަމަށް އީސީން ވަނީ ބުނެފައެވެ. 

އީސީގެ އެ ސިޓީއަށް އަލިއަޅުވާލައްވާ ހިސާން ވިދާޅުވީ ނިޒާމީ ވޯޓާއި ގުޅޭގޮތުން އީސީގެ އެހާބޮޑު ކަންބޮޑުވުންތަކެއް ފާޅުކުރެއްވީ، އެފަދަ މަސައްކަތެއް ކުރަންޖެހޭ ތަރުތީބު އޮޅުވާލައިގެން މަޖިލީހުން ކުރަމުންދިއުމުގެ ސަބަބުން ކަމަށެވެ. އަދި އެކަން މަޖިލީހުން ކޮށްފައިވާ ގޮތާއި މެދު މެމްބަރުން ލަދުވެތިވާން ޖެހޭކަމަށް ހިސާން ވިދާޅުވި އެވެ. 

ހިސާންގެ އިތުރުން ވެސް އެމްޑީޕީގެ ޕާލަމެންޓްރީ ގުރޫޕުގެ ލީޑަރު އަސްލަމް ވެސް ވަނީ ނިޒާމީ ވޯޓު ގަރާރަކީ އަވަސް އަރުވާލައިގެން ފާސްކޮށްފައިވާ ގަރާރެއްކަމަށް ވިދާޅުވެފަ އެވެ. އަދި އެ ގަރާރުގައި ފުރިހަމަ ނުވާ ގިނަ ކަންތައްތަކެއް ހުރިކަން ވެސް ފާހަގަކުރައްވާފަ އެވެ. 

އޭނާ ވިދާޅުވީ އެ ގަރާރު މަޖިލީހުގެ ދާއިމީ ކޮމެޓީއަކަށް ފޮނުވައި، އީސީގެ ކަންބޮޑުވުންތަކަށް ވެސް ފަރުވާއެއް ލިބޭނެ ގޮތަށް އިންތިޒާމު ކުރެވިގެން ވަގުތު ނަގައިގެން މަސައްކަތްތައް ކުރެވެން ޖެހޭ ކަމަށެވެ. 

ނިޒާމު ވޯޓުގެ ގަރާރު ފާސްކުރުމުގައި މަޖިލީހުން އަމަލުކޮށްފައިވަނީ ޒިންމާދާރުކަން ކުޑަ ގޮތަކަށްކަމަށް ހިސާން ވިދާޅުވެފައިވާއިރު، އިލެކްޝަންސް ކޮމިޝަނުން ވެސް ވަނީ ނިޒާމެއް ވޯޓެއް ނެގުމަށް އެ ކޮމިޝަނަށް އިތުރު މުއްދަތު ބޭނުންވާކަމަށް ހުށައަޅާފަ އެވެ.