ސަޢޫދީޢަރަބިއްޔާގެ ޤައުމީ އެއަރލައިން "ސަޢުދީއާ" ރީބްރޭންޑް ކޮށް ލޯންޗް ކޮށްފިއެވެ.

އެ އެއަރލައިނަށް ގެނައި އައު ބަދަލުތައް ދައްކާލުމަށް އެ އެއަރލައިނުން ވަނީ ހަފްލާއެއް ބާއްވައިފައެވެ. އެހަފްލާގައި ބަދަލު ގެނެސްފައިވާ އެ އެއަރލައިންގެ ލޯގޯ އާއި ފްލައިޓްތަކުގެ ބޭރުގެ ޑިޒައިން ތަކަށް ގެނެސްފައިވާ ބަދަލުތައް ދައްކާލައިފައިވެއެވެ.

ސަޢުދީއާ އިން ބުނެފައިވަނީ އެއަރލައިނަށް ގެނެސްފައިވާ ބަދަލު ތަކަކަކީ އެޤައުމުގެ ސަރުކާރުން 2030 ވަނަ އަހަރާއި ހަމައަށް އެޤައުމުގެ ސަރުކާރުން އިޤްތިޞާދީ ގޮތުން ހާސިލް ކުރަން ބޭނުންވާ ލަނޑުދަނޑިތަކަށް ވާސިލް ވުމަށް މަގުފަހި ވާނެ ހެން ގެނެވިފައިވާ ބަދަލު ތަކެކެވެ.

ސަޢުދިއާ އިން ބުނެފައިވަނީ އެއެރލައިނުން އަލަށް ތަޢާރަފްކުރި ފްލައިޓް ތަކުގެ ޑިޒައިން ތަކުގައި ބޭނުން ކޮށްފައިވާ ކުލަތަކަކީ ފެހުކުލަ އާއި ނޫކުލަ އަދި ވެލީގެ ކުލައެވެ.

ފެހިކުލައިން ރަމްޒުކޮށްދެނީ އެޤައުމުގެ ޝަރަފްވެރިކަން ކަމަށާއި، ނޫކުލައިން ރަމްޒު ކޮށްދެނީ ކަނޑާއި އުޑުކަމަށާއި އަދި ވެލީގެ ކުލައިން ރަމްޒު ކޮށްދެނީ އެޤައުމުގެ ސަހަރާތައް ކަމަށާއި އެކުލަ ގުޅިފައިވަނީ  އެޤައުމުގެ މުއްސަނދި ތާރީޚާއި ކަމަށް ސަޢުދިއާ އިން ބުނެފައިވެއެވެ.

ސަޢުދީއާ އަށް ގެނައި ބަދަލުތަކުގެ ތެރެއިން އެއަރލައިންގެ ކެބިންކްރޫއިންގެ ޔުނިފޯމް ތަކަށް ވެސް ވަނީ ބަދަލު ގެނެސްފައެވެ.

ސަޢުދީއާ އެއަރލައިންއަކީ 1947 ވަނަ އަހަރު ފެށިގެން އައި އެއަރލައިންއެކެވެ.