ސައުދީ ޕްރޮފެޝަނަލް ލީގުގެ ސެޕްޓެމްބަރު މަހުގެ މޮޅު ކުޅުންތެރިޔާގެ މަގާމު އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯއަށް ލިބިއްޖެ އެވެ. މިއީ މިމަގާމު ރޮނާލްޑޯ ޖެހިޖެހިގެން ހޯދި ދެވަނަ ފަހަރެވެ. އެގޮތުން މިދިޔަ އޮގަސްޓް މަހުގެ ލީގުގެ މޮޅު ކުޅުންތެރިއާގެ މަގާމު ހޯދީ ވެސް ރޮނާލްޑޯ އެވެ.

ސައުދީ ލީގުގައި އަލް ނަސްރުން ކުޅުނު ފުރަތަމަ ދެމެޗުން ބަލިވުމަށްފަހު އެންމެ ފަހު ކުޅުނު ހަ މެޗުން އެޓީމު މޮޅުވެފައި ވާއިރު، އުމުރުން 38 އަހަރުގެ ރޮނާލްޑޯ އަންނަނީ މިސީޒަނުގައި އަލް ނަސްރުގެ ޖާޒީގައި މޮޅު ކުޅުމެއް ދައްކަމުންނެވެ. 

އެގޮތުން މިދިޔަ ސެޕްޓެމްބަރު މަހުގެ ތެރޭގައި އެޓީމުން ލީގުގައި ހަތަރު މެޗު ކުޅެފައިވާއިރު މި ހަތަރު މެޗުގައި ރޮނާލްޑޯ ވަނީ ފަސް ލަނޑު ކާމިޔާބު ކުރުމުގެ އިތުރުން، އިތުރު ތިން ލަނޑު ޖެހުމަށް އެހީތެރިވެދީފައެވެ. މީގެ އިތުރުން ސެޕްޓެމްބަރު މަހުގެ ތެރޭގައި އެޓީމުން އޭއެފްސީ ޗެންޕިްއަންސް ލީގުގައި ދެ މެޗު ކުޅެފައިވާއިރު އެ ދެމެޗުން ވެސް މޮޅުވެ ގްރޫޕްގެ އެއްވަނައިގައި މިވަގުތު އަލް ނަސްރު އެވެ.

ސައުދީ ޕްރޮފެޝަނަލް ލީގުގައި ކޮންމެ ޓީމަކުން މިހާތަނަށް 8 މެޗު ކުޅެފައިވާއިރު ލީގުގެ އެންމެ ގިނަ ލަނޑުޖެހި ކުޅުންތެރިޔާގެ ލިސްޓްގެ ކުރީގައި މިވަގުތު އޮތީ ތަޖުރިބާކާރު ފޯވާޑް ރޮނާލްޑޯ އެވެ. އޭނާ ލީގުގައި ކުޅުނު 7 މެޗުގައި 10 ލަނޑު ކާމިޔާބު ކުރުމުގެ އިތުރުން، އިތުރު ފަސް ލަނޑު ޖެހުމަށް އެހީތެރިވެދީފައެވެ. 

މީގެއިތުރުން މިވަގުތު ސައުދީ ލީގުގެ އެސިސްޓް ރޭންކިންގެ އެއްވަނައިގައި ވެސް އޮތީ ދުނިޔޭގެ މޮޅު ކުޅުންތެރިއާގެ މަގާމު ފަސް ފަހަރު ހޯދާފައިވާ ކްރިސްޓިއާނޯ ރޮނާލްޑޯ އެވެ.