ހުޅުލެ އަކީ ވަކި ދާއިރާއަކަށް ނުވެފައި، ދާއިރާއަށް ޚާއްސަ މެމްބަރެއް މަޖިލީހުގައި ނެތީތީ ފާއިތުވި ފަސް އަހަރު ހުޅުލޭ އެއާޕޯޓު ހުއްޓިފައި އޮތް ވާހަކަ މަޖިލީހުގައި ދައްކާނެ ބޭފުޅެއް ނެތްކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ. 

ވައްޑެ މިފަދައިން ވިދާޅުވެފައި ވަނީ ހުޅުދޫ ދާއިރާގެ މެމްބަރު އިލްޔާސް ލަބީބް ހުށައަޅުއްވާފައިވާ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީއަށް އިސްލާޙު ގެނައުމުގެ ބިލަށް މަޖިލީހުގައި ވާހަކަދައްކަވަމުން ނެވެ. 

ވަހީދު ވިދާޅުވީ ރައްޔިތުންގެ މަޖިލީހުގެ މެމްބަރުންނަކީ ޖުމްލަކޮށް ރާއްޖޭގެ މައްސަލަތަކަށް ވަކާލާތު ކުރާ، އަދި އެ މައްސަލަތައް ޙައްލުކުރުމަށް ބަހުސްކުރާ ބަޔަކަށް ވާން ޖެހޭ ކަމަށެވެ. 

އެހެން ނަމަވެސް ކޮންމެ ދާއިރާތަކަށް ނިސްބަތްވާ މެމްބަރުން ވާހަކަދައްކަވާއިރު، ހަމައެކަނި އެ ދާއިރާއަކަށް ހުރި ކަންކަމުގެ ވާހަކަތައް ދައްކާއިރު މުޅި ގައުމުގެ މަސްލަހަތާއި ގައުމުގެ ތަރައްގީގެ ވާހަކަ އޮންނަނީ ހަވާސާގައި ބޭއްވިފައި ކަމަށް ވައްޑެ ވިދާޅުވި އެވެ. 

ވައްޑެ ވިދާޅުވީ ރައްޔިތުންގެ މަޖިލީހުގައި އަންހެނުން ތަމްސީލުވުމަކީ ވެސް މުހިންމު ކަމެއް ކަމަށެވެ. އަންހެނުން ބާރުވެރި ކުރުވާ ވާހަކަ ދައްކާއިރު، އެމީހުންނަށް ސިޔާސީ މަސައްކަތް ކުރުމަށް އޮތް ގޮންޖެހުންތައް ދެނެގަނެ، އެކަން މަގުފަހިކޮށްދިނުމަކީ ކޮންމެެހެން ކުރަން ޖެހޭ ކަމެއްކަމަށް ވައްޑެ ވިދާޅުވި އެވެ. 

އަދި ކޮންމެ އާ ދައުރެއްގައި މަޖިލީހުގެ މެމްބަރުން އިތުރުވާގޮތަށް އޮތް އޮތުމަށް ބަދަލުގެނެސް ރައްޔިތުންގެ މަޖިލީހުގެ އަދަދު ވަކި ހިސާބެއްގައި ހިފެހެއްޓިފައި އޮންނާނެ ފަދަ އުސޫލަކުން ކަންކަން ތަރުތީބުވާން ޖެހޭނެކަމަށް ވައްޑެ ވަނީ ވިދާޅުވެފަ އެވެ.