މިހާރު އިންތިޚާބު ކުރެވިފައިވާ އައު ސަރުކާރުގައި ހަޤީޤީ މާނައިގައި ކައުންސިލް ހިންގުމުގެ ބާރު ލިބިގެންދާނެ ކަމަށް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ޑރ މުޢިއްޒު މިހެން ވިދާޅުވީ ވެރިކަމުގެ ހުވައި ކުރައްވައި ޤައުމު ހިންގުމުގެ މަސްޢޫލިއްޔަތާއި ހަވާލުވެވަޑައިގެންނެވުމުގެ ކުރިން މާލޭ ސިޓީ ކައުންސިލްގެ ހިންގެވުން ޑެޕިޔުޓީ މޭޔަރު ނަރީޝް އާއި ހަވާލުކުރެއްވުމުގެ ކުރިން ސިޓީ ކައުންސިލާއި އެކު ބޭއްވެވި ބައްދަލުވުމުގައި ވާހަކަ ދައްކަވަމުންނެވެ.
ޑރ މުޢިއްޒު ވިދާޅުވީ މިހާރު މިއޮތް ސަރުކާރުން މާލެ ސިޓީ ކައުންސިލުން ޕްލޭން ކުރި ގިނަ ކަންކަމަށް ހުރަސް އެޅިކަމަށެވެ. މުޢިއްޒު ވިދާޅުވީ ހަޤީޤީ މާނާގައި ލާމަރުކަޒީ ނިޒާމު ހިންގުމަށް މިސަރުކާރުން ވަރަށް ބޮޑަށް ހުރަސް އެޅިކަމަށެވެ.
މިއާއު އެކު މުޢިއްޒު ވިދާޅުވީ އެމަނިކުފާނުގެ ވެރިކަމެއްގައި ހަޤީޤީ މާނާގައި ކައުންސިލްތައް ހިންގުމުގެ ފުރުސަތު ލިބިގެންދާނެކަމަށެވެ.
"އިރާދަ ކުރެއްވިއްޔާ ކުރިއަށް އޮތީ މާލެ ސިޓީ ކައުސިލަށްވެސް މިހެންހުރި ހުރިހާ ކަމެއް ކުރެވިގެންދާނެ ދުވަސްތަކެއް" ޑރ މުޢިއްޒު ވިދާޅުވިއެވެ.
އިންތިޚާބީ ރައީސް ޑރ މުޢިއްޒު ވިދާޅުވީ އެމަނިކުފާނުގެ ވެރިކަމެއްގައި ސިޓީ ކައުންސިލަށް މި ސަރުކާރުގައި ނުދީ ހުރި ހުއްދަތައް ދެއްވާނެ ކަމަށެވެ. އަދި ރާއްޖޭގެ އެހެން ކައުންސިލުތަކަށް އެގޮތުން ހުރި ދަތިތައް ވެސް ހައްލުކޮށްދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
