ޔުއެފާ ޗެމްޕިއަންސްލީގު ގްރޫޕް އެޗްގައި މިރޭ ރަށުން ބޭރުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ޕޯޓޯ ބަލިކޮށް ބާސެލޯނާ އިން ގުރޫޕްގެ އެއްވަނައިގައި ހަމަޖެހިލައިފި އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިފާހުގައި ދެޓީމުން ވެސް ވަނީ ލަނޑުޖަހާނެ ރަގަޅު ހުސް ފުރުސަތެއް ތަނަވަސްކޮށްފައެވެ.

މިހާފުގައި ޕޯޓޯ އިން އެންމެ ހުސް ފުރުސަތެއް ލިބުނީ އެޓީމުގެ ކެނަޑާ މިޑްފީލްޑަރު ސްޓެފަން ޔޫސްޓެކިއޯ އަށެވެ. ބާސެލޯނާގެ ޕެނަލްޓީ އޭރިއާ ތެެރެއިން ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ މާކް އަންދްރޭ ޓާ ސްޓެގަން ވަނީ ހުޝިޔާރުކަމާއެކު ދިފާއުކޮށްފައެވެ.

Advertisement

އޭގެ ތިން މިނެޓު ފަހުން ބާސެލޯނާގެ ޖޮއާއު ފެލިކްސް އަށް ވެސް ވަނީ ލަނޑުޖަހާނެ ރަގަޅު ހުސް ފުރުސަތެއް ލިބި ބޭނުން ނުކުރެވިފައެވެ.

މިމެޗުގައި ބާސެލޯނާ އިން ލީޑު ހޯދި ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ފެރާން ޓޮރޭސް އެވެ. މިއީ ޕޯޓޯގެ ފަހަތުން ހެދުނު ގޯހެއްގެ ފައިދާ ނަގައި ގުންޑޮގާން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޕޯޓޯ އިން ވަނީ އެޓީމުގެ ކުޅުން ރަނގަޅުކޮށް ބާސެލޯނާގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. މިހާފުގައި ބާސެލޯނާގެ ގޯލްކީޕަރު މާކް އަންދްރޭ ޓާ ސްޓެގަން ގެ ފަރާތުން މޮޅު ސޭވްތަކެއް ފެނިގެންދިޔަ އިރު މެޗުގެ 83 ވަނަ މިނެޓުގައި ޕޯޓޯ އިން ލަނޑެއް ވެސް ކާމިޔާބުކުރި އެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މެޗުގެ އިތުރު ވަގުތުގެ ތެރޭގައި ރެފްރީ ވަނީ ބާސެލޯނާގެ ޒުވާން މިޑްފީލްޑަރު ގަވީއަށް ދެވަނަ ރީނދޫ ކާޑާއެކު ރަތްކާޑު ދައްކައި ދަނޑުން ފޮނުވާލައިފައެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު ގްރޫޕުގެ އެއްވަނައިގައި މިވަގުތު އޮތީ ބާސެލޯނާ އެވެ. އަދި މިމެޗުން ބަލިވި ޕޯޓޯ ދެ މެޗު ކުޅެގެން ލިބުނު ތިން ޕޮއިންޓާއެކު މިވަގުތު އޮތީ ގްރޫޕްގެ ދެވަނައިގައެވެ.