ޔުއެފާ ޗެމްޕިއަންސްލީގު ގްރޫޕް އެފްގައި ރޭ އަމިއްލަ ދަނޑުގައި 4-1 ގެ ތަފާތުބޮޑު ނަތީޖާއަކުން ފްރާންސްގެ ޗެމްޕިއަން ޕީއެސްޖީ ބަލިކޮށް 20 އަހަރަށް ފަހު ނިއުކާސަލް ޔުނައިޓެޑުން މިމުބާރާތުގެ ފުރަތަމަ މޮޅު ހޯދައިފި އެވެ.

މެޗުގެ ފުރަތަަމަ ހަމަލާ ފެނިގެންދިޔައީ ޕީއެސްޖީގެ ފޯވާޑް އުސްމާން ޑެންބެލޭގެ ފަރާތުންނެވެ. ނަމަވެސް އޭނާ ފޮނުވާލި ބޯޅަ ގޯލާއި އަމާޒުނުވެ ބޭރަށް ދިޔައިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ނިއުކާސަލް ޔުނައިޓެޑުންނެވެ. މިލަނޑު ފުރަތަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕެރަގުއޭ މިޑްފީލްޑަރު މިގުއެލް އަލްމިރޮން އެވެ.

މިއީ 2003 ވަނަ އަހަރު މާޗުމަހު އިންޓަ މިލާނާއި ދެކޮޅަށް އެޓީމުގެ އެލަން ޝިއަރާ ޖެހި ދެ ލަނޑަށްފަހު މި މުބާރާތުގައި ނިއުކާސަލް ޔުނައިޓެޑުން ކާމިޔާބުކުރި ފުރަތަމަ ލަނޑެވެ. 

މިމެޗުގައި ނިއުކާސަލް ޔުނައިޓެޑުން ކާމިޔާބުކުރި ދެވަނަ ލަނޑު ފުރަތަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ އިގިރޭސި ޑިފެންޑަރު ޑޭން ބާން އެވެ. މިއީ އެޓީމުގެ ބްރެޒިލް މިޑްފީލްޑަރު ބްރޫނޯ ގުއިމަރޭސް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ނިއުކާސަލް ޔުނައިޓެޑް ކުރީގައި އޮވެގެންނެވެ.

ދެވަނަ ހާފު ފެށިގެން ފަސްވަނަ މިނެޓްގައި ނިއުކާސަލް ޔުނައިޓެޑުން އިތުރު ލަނޑެއް ކާމިޔާބުކޮށް މެޗުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އިގިރޭސި މިޑްފީލްޑަރު ޝޯން ލޯންގްސްޓާފް އެވެ. މިއީ އެޓީމުގެ ޑިފެންޑަރު ކިރަން ޓްރިޕިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ ގަ މިނެޓް ފަހުން ޕީއެސްޖީގެ ޑިފެންޑަރު ލޫކަސް ހެނާންޑޭޒް ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. 

މިމެޗުގައި ނިއުކާސަލް ޔުނައިޓެޑުން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ސްވިޒަލޭންޑް ޑިފެންޑަރު ފަބިއަން ޝާރ އެވެ. މިއީ އެޓީމުގެ އިގިރޭސި ފޯވާޑް ޖެކޮބް މައުރްފީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-1 ގެ ނަތީޖާއަކުން ނިއުކާސަލް ޔުނައިޓެޑް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް ގުރޫޕް އެއްވަނައިގައި މިވަގުތު އޮތީ ނިއުކާސަލް ޔުނައިޓެޑް އެވެ. އަދި މިމެޗުން ބަލިވި ޕީއެސްޖީއަށް ދެ މެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ގްރޫޕްގެ ދެވަނައިގައެވެ.