ހުރިހާ މުދައްރިސުންނަށް 2023 ވަނަ އަހަރުގެ ބައިނަލްއަޤުވާމީ މުދައްރިސުންގެ ދުވަހުގެ ތަހުނިޔާ، އިންތިޚާބީ ރައީސް ޑރ މުހައްމަދު މުޢިއްޒު އަރުއްވައިފި އެވެ. 

ބައިނަލްއަޤުވާމީ މުދައްރިސުންގެ ދުވަހުގެ ހެޔޮއެދުމާއި ތަހުނިޔާ، ދިވެހިރާއްޖޭގެ އެކި ކަންކޮޅުތަކުގައި އުނގަންނާދެއްވާ މުދައްރިސުންނަށާއި ތަޢުލީމީ ހުރިހައި މަރުޙަލާއެއްގައި އުގަންނައިދިނުމުގެ އަގުހުރި ޚިދުމަތް އަދާކުރައްވާ އެންމެހައި ބޭފުޅުންނަށް ޑރ. މުޢިއްޒު ވަނީ އަރިސްކުރައްވާފައެވެ.

"މުދައްރިސުންނަކީ ޤައުމުން އަނދިރިކަން ނައްތައިލާ ބައްތިތަކެވެ. ކަތިކަން ނައްތައިލާ ރަހަފަތިތަކެވެ. އަންނަހައި ޖީލުތައް ހެޔޮ މިސްރާބަށް ގެންދިޔުމުގެ އުނދަގޫ ދަތުރާ ހަވާލުވެގެންވާ ސަވާރީތަކެވެ." މުދައްރިސުންގެ ދުވަހުގެ ތަހުނިޔާ އަރިސް ކުރައްވައި ފޮނުވި މެސެޖުގައި ޑރ. މުޢިއްޒު ވިދާޅުވިއެެވެ. 

Advertisement

މިއާއެކު މުޢިއްޒު ވިދާޅުވީ، ކާމިޔާބީގެ އައްސޭރިޔަށް ޤައުމަކަށް ވާޞިލުވެވޭނީ މައިގަނޑު ތިން އަސާސެއްގެ މައްޗަށް އެ ޤައުމެއްގެ ތަޢުލީމީ ނިޒާމު ބިނާވެގެން ކަމަށެވެ. އެއީ ހަރުދަނާ އަޚްލާޤާއި، ތަނަވަސް ޢިލްމާއި ކުޅަދާނަ ހުނަރުވެރިކަން ކަމަށް އެމަނިކުފާނު ވިދާޅުވި އެވެ. 

"މި ފުރުޞަތުގައި އަޅުގަނޑު ރާއްޖޭގެ ހިވާގި މުދައްރިސުންނަށް ދަންނަވައިލަން ބޭނުންވާ ދެ ކަމެއް އެބަ އޮތެވެ. ފުރަތަމަ ކަމަކީ، މި އަހަރު މުދައްރިސުންގެ ދުވަހުގެ ޝިޢާރުން ވެސް އިޝާރާތްކުރާ އެއް މައްސަލައެވެ. މުދައްރިސުންގެ ޢަދަދު މަދުކަމެވެ. މިއީ ރާއްޖެއަށް ވެސް އޮތް މައްސަލައެކެވެ. ދެވަނަ ކަމަކީ ކިޔަވައި ނިމިގެން ނިކުންނަ ކުދިންގެ ކިބައިގައި ޤައުމަށް ބޭނުންވާ ޤާބިލުކަން ހުރޭތޯ ބައެއް ފަރާތްތަކުން އުފައްދާ ސުވާލެވެ." މުޢިއްޒު ވިދާޅުވިއެެވެ.

މުޢިއްޒު އިތުރަށް ވިދާޅުވީ އެމަނިކުފާނު ފާހަގަކުރެއްވި އެ ދެ މައްސަލައަށް ވެސް ދެން އުފެދިގެން އަންނަ ސަރުކާރުން ވަރަށް އިސްކަންދެއްވާނެ ކަމަށެވެ.

އަދި 21 ވަނަ ޤަރުނުގެ ދަރިވަރެއްގައި ހުނަންޖެހޭ ތޫނުކަމާއި ހުޝިޔާރުކަމާ، ޤާބިލުކަމާއި އުޅުންތެރިކަމާއި، އިޖުތިމާޢި މިންގަނޑުތަކަށް ކަމޭ ހިތުމާއި އުފަން ބިމަށް ލޯބިކުރުމުގެ މާތް ސިފަތައް އަށަގަންނާނެ ފަދަ ގޮތަކަށް މަންހަޖު އަލުން ބައްޓަންކުރައްވާނެ ކަމަށް މުޢިއްޒު ވިދާޅުވިއެެވެ. 

މި އެއާއެކު، ކަމާ ގުޅޭ އިތުރު ހަރުދަނާ ފިޔަވަޅުތައް އަޅައި މުދައްރިސުން ތާޒާކޮށް، މުދައްރިސުންގެ ދުޅަހެޔޮކަމަށް ޚާއްޞަ އިސްކަމެއް ދީ، މުދައްރިސުންގެ މަސައްކަތުގެ ވަގުތުތަކާއި ޒާތީ ދިރިއުޅުން މީޒާންހަމަކުރުމަށް ފަހިވާނެހެން ސިޔާސަތުތައް ފަރުމާކުރައްވާނެ ކަމަށްވެސް މުޢިއްޒު ވިދާޅުވިއެެވެ. އަދި، މުދައްރިސުން ކުރައްވާ މިންނެތް މަސައްކަތުގެ ހައިބަތު ނެގެހެއްޓުމަށް ފަހިވާނެހެން، މުދައްރިސުންގެ އިދާރީ އޮނިގަނޑުތައް ބައްޓަންކޮށް، މުޖުތަމަޢުގައި މުދައްރިސުންގެ ޤަދަރާއި ޝަރަފު މަތިވެރިކުރައްވާނެ ކަމަށް މުޢިއްޒު ވިދާޅުވިއެެވެ. 

މިއާއެކު މުޢިއްޒު ވަނީ ދިވެހި ޖީލުތައް ޢިލްމާއި ހުނަރާއި ތަރުބިއްޔަތުގެ ނޫރުން އުޖާލާކުރުމަށް މުދައްރިސުން ކުރައްވަމުންގެންދަވާ މާތް މަސައްކަތުގައި ބަރަކާތްލައްވަވައި، ތައުފީޤު މިންވަރުކުރެއްވުން އެދި ދުޢާ ކުރައްވާފައެވެ.