ޑިސެމްބަރު މަހު ބޭއްވުމަށް ހަމަޖެހިފައިވާ މިޞްރުގެ އިންތިޚާބުގައި މިޞްރުގެ ރައީސް ޢަބްދުލް ފައްތާޙް އަލްސީސީ އާއި ވާދަކުރުމުގެ މަގުވަނީ ބަންދުކޮށްފައި ކަމަށް މިޞްރުގެ އިދިކޮޅު ޕާޓީ ތަކުން ބުނެފިއެވެ.
މިޞްރުގެ އިދިކޮޅު ޕާޓީއެއް ކަމަށްވާ ސިވިލް ޑިމޮކްރެޓިކް މޫވްމެންޓުން ބުދަ ދުވަހު ބޭއްވު ނޫސްވެރިންގެ ބައްދަލުވުމެއްގައި އިންތިޚާބުގައި އިދިކޮޅު ފަރާތްތަކުން ވާދަ ކުރުމަށް އަލްސީސީ ހުރަސް އަޅަމުން ދާ ކަމަށް ވަނީ ބުނެފައެވެ.
މިކަމާއި ގުޅިގެން މިޞްރުގެ އިންތިޚާބު ތަކާއި ބެހޭ އޮތޯރިޓީ އިން ބުނެފައިވަނީ ހުށައެޅިފައިވާ ޝަކުވާގެ މައްސަލަތައް ތަހްޤީޤީ ކުރެވިފައިވާ ކަމަށާއި އެވާހަކަތަކަކީ އެއްވެސް އަސްލެއް ނެތް ވާހަކަ ތަކެއް ކަމަށެވެ.
މިޞްރުގެ އިންތިޚާބާއި ބެހޭ ޤަވާއިދުގެ ދަށުން މިޞްރުގެ ރައީސް ކަމަށް ވާދަކުރުމަށް ހުށައެޅެނީ ޢާންމު ރައްޔިތުންގެ 25000 މީހެއްގެ ފުރިހަމަ ތާއީދާއި 15 ގަވަރުނަރެއް ނުވަތަ ޤާނޫނު ހަދާ މަޖިލީހުގެ 20 މެމްބަރެއްގެ ތާއީދާއި އެކު 14 އޮކްޓޫބަރުގެ ކުރިން ކެންޑިޑެސީ ރެޖިސްޓަރ ކޮށްގެނެވެ.
މިޞްރުގެ ވެރިއަކަށް ހުންނެވި އަލްސީސީ ވަނީ ޑިސެމްބަރު މަހު ބޭއްވުމަށް ހަމަޖެހިފައިވާ އެޤައުމުގެ ރިޔާސީ އިންތިޚާބުގައި ތިންވަނަ ދައުރަކަށް އިންތިޚާބު ވެވަޑައިގަތުމުގެ އުންމީދާއި އެކު ކުރިމަތިލައްވާނެ ކަމަށް ވިދާޅުވެފައެވެ.
ސަރުކާރުގެ ފަރާތުން އިދިކޮޅު ޕާޓީ ތަކަށް ކުރިމަތިވަމުންދާ ހުރަސް ތަކުގެ ސަބަބުން މިޞްރުގެ އިންތިޚާބު މިނިވަން ވާނެ މިންވަރާއި މެދު މިޞްރުގެ ސިޔާސީ މަސްރަޙް ދިރާސާ ކުރައްވާ ފަރާތްތަކުން ވަނީ ސުވާލު އުފައްދަވައިފިއެވެ.
Advertisement
This content is created and paid for by advertisers and does not involve Voice Journalists
