އިންތިޚާބީ ރައީސް ޑރ.މުޙައްމަދު މުޢިއްޒަށް ތާއީދުކުރެއްވުމަށް ކުރަންޖެހުނު ހުރިހާ މަސައްކަތެއް ކުރައްވާނެ ކަމުގައި އިދިކޮޅު އިއްތިހާދުގެ ލީޑަރު އަދި ކުރީގެ ރައީސުލްޖުމްހޫރިއްޔާ ރައީސް ޢަބްދުالله ޔާމީން ޢަބްދުލްޤައްޔޫމު ވިދާޅުވެއްޖެއެވެ.
މާފުށީ ޖަލުން ގެއަށް ބަދަލު ކުރެއްވި ފަހުން ފުރަތަމަ ފަހަރަށް ސަޕޯޓަރުންނާއި މުޚާތަބުކުރައްވައި ވާހަކަފުޅުދައްކަވަމުން ރައީސް ޔާމީން ވިދާޅުވީ، އެމަނިކުފާނުގެ ތާއީދާއެކު، ނިމިދިޔަ ރިޔާސީ އިންތިޚާބު ކާމިޔާބުކުރެއްވި ޑރ.މުޢިއްޒަށް ދެވެން އޮތް ހުރިހާ ގޮތަކުން އެއްބާރުލުން ދެއްވާނެކަމަށެވެ.
"އަޅުގަނޑުމެން މިކުރާ މަސަތްކަތުގައި މިހާރު ހޮވިވަޑައިގެން ހުންނެވި ރައީސްއަށް (ޑރ. މުޢިއްޒަށް) ތާއިދުކުރުމަށް ކުރަންޖެހުނު ހުރިހާ މަސައްކަތެއް އަޅުގަނޑުމެން ކުރާނަން،"
ރައީސް ޔާމީން އަބްދުލްގައްޔޫމް
ރައީސް ޔާމީން އިތުރަށް ވިދާޅުވީ އެމަނިކުފާނު ޖަލުގައި ބަހައްޓައިގެން ރިޔާސީ އިންތިހާބު އެއްބުރުން ކާމިޔާބު ކުރެވޭނެ ކަމަށް މި ސަރުކާރާއި އިންޑިއާ އިން އުއްމީދު ކުރި ކަމަށާ އެހެންނަމަވެސް މިހާރު ސަރުކާރުގައި ތިއްބެވި ބޭފުޅުންނަށް ހަގީގީ މަންޒަރު ފެންނާނެ ކަމަށް ވިދާޅުވި އެވެ.
"މިހާތަނަށް މި ސަރުކާރުން އަދި އިންޑިއާ ސަރުކާރުންވެސް ވަރަށް ގިނަ މަސައްކަތްތަކެއް އެކުރީ އަޅުގަނޑު ޖަލުގައި ބަހައްޓައިގެން އިންތިހާބު ކާމިޔާބު ކުރެވޭނެ ކަމަށް. ފުރަތަމަ ބުރުގައި ވެސް އަޅުގަނޑު ނުނިކުންނަ ކަމުގައިވަނީނަމަ ކާމިޔާބު ކުރެވޭނެ ކަމަށް ޔަގީންކޮށްގެން ތިބީ،" ރައީސް ޔާމީން ވިދާޅުވި އެވެ.
މިއާއެކު ރައީސް ޔާމީން ވިދާޅުވީ ފާއިތުވި ދުވަސްތަކުގައި ޖަލުގައި ހުންނަވަން ޖެހުނު ނަމަވެސް އެމަނިކުފާނަށް ލިބޭ އެންމެ ބޮޑު އުފަލަކީ މި ސަރުކާރު ބަދަލުކޮށް އިދިކޮޅަށް އިންތިހާބު ކާމިޔާބު ކުރެވުން ކަމަށެވެ.
"އަޅުގަނޑުވާ އެންމެ ބޮޑު އުފަލަކީ، އަޅުގަނޑު އަދިވެސް ޖަލުގައި ހުރެދާނަން، އެކަމު މި ސަރުކާރު ބަދަލުވުން. އަނިޔާވެރިކަމުގެ ވާހަކަދެއްކި މީހުން އަނިޔާވެރިވީ ދިވެހި ރައްޔިތުންނަށް. އަޅުގަނޑަށް އެކަންޏެއް ނޫން، ދިވެހި ރައްޔިތުންނަށް." ރައީސް ޔާމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
