"އެސްޓީއޯ ޖޯޒީ އެމްވީ ފުޓްސަލް ޗެލެންޖް 2023" ގުރޫޕް ސްޓޭޖު މެޗުތައް ނިމި ސެމީފައިނަލްގެ ދެމެޗް މިރޭ ކުޅުމަށް ވަނީ ހަމަޖެހިފައެވެ.

ޗެންޕިއަން ޓީމަށް 20000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ޖުމްލަ 8 ޓީމު ބައިވެރިވެފައިވާއިރު މުބާރާތުގެ މެޗުތައް ކުރިއަށް ގެންގޮސްފައިވަނީ ބައިވެރިވި ޓީމުތައް ދެ ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ސެމީ ފައިނަލަށް ހޮވޭގޮތަށެވެ.

މިރޭ 20:30 ގައި ކުޅުމަށް ހަމަޖެހިފައިވާ ސެމީ ފައިނަލުގެ ފުރަތަމަ މެޗުގައި ވާދަކުރަނީ ގްރޫޕް އޭގެ އެއްވަނަ ޖީޖީއެސްސީ އާއި ގްރޫޕް ބީގެ ދެވަނަ ރަސްހިންނެ އެސްސީ އެވެ. އަދި 21:30 ގައި ކުޅުމަށް ހަމަޖެހިފައިވާ ސެމީ ފައިނަލުގެ ދެވަނަ މެޗުގައި ވާދަކުރަނީ ގުރޫޕް ބީގެ އެއްވަނަ ބްރޭވް ޖެނެރޭޝަން އާއި ގުރޫޕް އޭގެ ދެވަނަ ހައިޑްރާ އެސްސީ އެވެ.

Advertisement

ޖީޖީއެސްސީ ގުރޫޕް އޭގެ އެއްވަނަ ހޯދީ ކުޅުނު ތިން މެޗުން ވެސް މޮޅުވެ 9 ޕޮއިންޓާއެކު އެކުއެވެ. އަދި މިގުރޫޕްގެ ދެވަނަ ހޯދި ހައިޑްރާ އެސްސީ ކުޅުނު ތިން މެޗުގެ ތެރެއިިން ދެމެޗުން މޮޅުވިއިރު، އެޓީމު ބަލިވީ ޖީޖީއެސްސީ އައި ދެކޮޅަށް ކުޅުނު މެޗުންނެވެ.

ގުރޫޕް ބީގެ އެއްވަނަ ބްރޭވް ޖެނެރޭޝަން ހޯދީ ކުޅުނު ތިން މެޗުގެ ތެރެއިިން ދެމެޗުން މޮޅުވެ އެއްމެޗު އެއްވަރުވެ، 7 ޕޮއިންޓާއެކު ލަނޑުގެ ތަފާތުންނެވެ. އެޓީމަށް ފައިދާ 34 ގޯލު ލިބުނު އިރު، މިގުރޫޕްގެ ދެވަނަ ހޯދީ ރަސްހިންނެ އެސްސީ އަށް ވެސް ތިން މެޗުން 7 ޕޮއިންޓް ލިބިފައިވާއިރު އެޓީމު ލިބުނީ ފައިދާ 10 ގޯލެވެ. އަދި މިދެޓީމު ގުރޫޕް ސްޓޭޖުގައި ވާދަކުރި މެޗު ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.

މިމުބާރާތަކީ ޖޯޒީ އެމްވީގެ ފަރާތުން އިންތިޒާމްކޮށްގެން ލ.އަތޮޅުގެ ޒުވާނުންގެ މެދުގައި ކުޅިވަރުގެ ރޫހް ދިރުވައި އެކުވެރިކަމާއި އެއްބައިވަންތަކަން އާލާކޮށް ކުޅިވަރުގެ ތެރެއިން ކުށް މަދު މުޖުތަމައެއް ބިނާކުރުމަށް ބާރުއެޅުމާއެކު، ދުޅަހެޔޮ ސިއްހަތަކަށް މަގުފަހިކުރުމުގެ ފުރުސަތު ތަނަވަސް ކޮށްދިނުމުގެ ގޮތުން ބާއްވާ މުބާރާތެކެވެ. އަދި މީގެ އިތުރުން މިއީ ޖޯޒީ އެމްވީގެ ފަރާތުން އިންތިޒާމްކޮށްގެން ބާއްވާ ފުރަތަމަ ފުޓްސަލް މުބާރާތެވެ.

މުބާރާތުގެ މެއިން ސްޕޮންސަރ އަކީ އެސްޓީއޯ އެވެ. އަދި މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.