"އެސްޓީއޯ ޖޯޒީ އެމްވީ ފުޓްސަލް ޗެލެންޖް 2023" ގެ ސެމީފައިނަލް ދެވަނަ މެޗުގައި މިރޭ ފަސޭހަކަމާއި އެކު 8-0 ގެ ނަތީޖާއަކުން ހައިޑްރާ އެސްސީ ބަލިކޮށް މުބާރާތުގެ ފައިނަލުގެ ދެވަނަ ޖާގަ ބްރޭވް ޖެނެރޭޝަން އިން ހޯދައިފިއެވެ.

މުބާރާތުގެ ސެމީ ފައިނަލުން ބްރޭވް ޖެނެރޭޝަން ޖާގަ ހޯދީ ގްރޫޕް ބީގެ އެއްވަނަ ޓީމުގެ ގޮތުގައެވެ. މުބާރާތުގައި އެޓީމުން ކުޅުން ތިން މެޗުގެ ތެރެއިިން ދެމެޗުން މޮޅުވެ އެއްމެޗު އެއްވަރުވެފައިވާއިރު، ގްރޫޕްގެ އެއްވަނަ މަގާމަށް އެޓީމަށް ލިބުނީ ފައިދާ ގޯލުގެ ތަފާތުންނެވެ. ހައިޑްރާ އެސްސީ ސެމީ ފައިނަލުން ޖާގަ ހޯދީ ގްރޫޕް އޭގެ ދެވަނަ ޓީމުގެ ގޮތުގައެވެ. އެޓީމު ގުރޫޕް ސްޓޭޖުގައި ކުޅުނު ތިން މެޗުގެ ތެރެއިިން ދެމެޗުން މޮޅުވިއިރު، އެއްމެޗުން ވަނީ ބަލިވެފައެވެ.

މިމެޗުގެ ފުރަތަމަ ހާފުގައި ބްރޭވް ޖެނެރޭޝަން އިން ތިން ލަނޑުގެ ލީޑެއް ނެގިއިރު، އެޓީމުގެ ފުރަތަމަ ލަނޑު 7 ވަނަ މިނެޓުގައި ކާމިޔާބުކޮށްދިނީ އަލީ އަލްސަން އެވެ. އަދި އޭގެ ތިން މިނެޓު ފަހުން އަލްސަން އެޓީމުގެ ދެވަނަ ލަނޑު ކާމިޔާބުކޮށްދިންއިރު، ފުރަތަމަ ހާފު ނިމުމުގެ ކުރިން އަލްސަން ވަނީ އިތުރު ލަނޑެއް ކާމިޔާބުކޮށް މިމެޗުގައި އޭނާގެ ހެޓްރިކް ފުރިހަމަކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ބްރޭވް ޖެނެރޭޝަން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބްރޭވް ޖެނެރޭޝަން އިން ވަނީ އެޓީމުގެ އެޓޭކުތައް އިތުރަށް ވަރުގަދަކޮށް އިތުރު ފަސް ލަނޑު ކާމިޔާބުކޮށްފައެވެ. އަދި މިހާފުގައި އެޓީމުގެ އަހުމަދު ވިޖުދާން ދެލަނޑު ކާމިޔާބުކުރި އިރު، މުހައްމަދު ތޯހިރު އަދި އަލީ އަރުޝަދު ގެ އިތުރުން އަހުމަދު ވިޝާހު، މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 8-0 ގެ ނަތީޖާއަކުން ބްރޭވް ޖެނެރޭޝަން ކުރީގައި އޮވެގެންނެވެ. މިމެޗުގެ މޭން އޮފް ދަ މެޗަކަށް ހޮވުނީ ބްރޭވް ޖެނެރޭޝަންގެ އަލީ އަލްސަން އެވެ.

މުބާރާތުގެ ފައިނަލު މެޗުގައި މިމަހުގެ 8 ވަނަ ދުވަހުގެ ރޭ 20:30 ގައި ބްރޭވް ޖެނެރޭޝަން ނުކުންނާނީ ސެމީފައިނަލްގެ ފުރަތަމަ މެޗުގައި 4-1 ގެ ނަތީޖާއަކުން ރަސްހިންނެ އެސްސީ ބަލިކޮށް ފައިނަލުން ޖާގަ ހޯދި ޖީޖީއެސްސީ އާއި ދެކޮޅަށެވެ.

މިމުބާރާތަކީ ޖޯޒީ އެމްވީގެ ފަރާތުން އިންތިޒާމްކޮށްގެން ލ.އަތޮޅުގެ ޒުވާނުންގެ މެދުގައި ކުޅިވަރުގެ ރޫހް ދިރުވައި އެކުވެރިކަމާއި އެއްބައިވަންތަކަން އާލާކޮށް ކުޅިވަރުގެ ތެރެއިން ކުށް މަދު މުޖުތަމައެއް ބިނާކުރުމަށް ބާރުއެޅުމާއެކު، ދުޅަހެޔޮ ސިއްހަތަކަށް މަގުފަހިކުރުމުގެ ފުރުސަތު ތަނަވަސް ކޮށްދިނުމުގެ ގޮތުން ބާއްވާ މުބާރާތެކެވެ. އަދި މީގެ އިތުރުން މިއީ ޖޯޒީ އެމްވީގެ ފަރާތުން އިންތިޒާމްކޮށްގެން ބާއްވާ ފުރަތަމަ ފުޓްސަލް މުބާރާތެވެ.

މިމުބާރާތުގެ ޗެމްޕިއަން ޓީމަށް 20,000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މުބާރާތުގެ މެއިން ސްޕޮންސަރަކީ އެސްޓިއޯ އެވެ. އަދި މިމުބާރާތުގެ މީޑިއާ ޕާޓްނަރަކަށް ހަމަޖައްސާފައި ވޮއިސް އެވެ.