ދެކުނު އެމެރިކާގެ ކުލަބު ތަކުގެ މެދުގައި ކުޅެވޭ އެންމެ ޝަރަފުވެރި ފުޓްބޯޅަ މުބާރާތް ކޮޕާ ލިބަޓަޑޯރެސް 2023 ގެ ފައިނަލުން ބްރެޒިލްގެ ފްލޫމިނެންސް އާއި އާޖެންޓީނާގެ ބޮކާ ޖޫނިއާސް ޖަގަ ހޯދައިފިއެވެ.

ބޮކާ ޖޫނިއާސް އިން މިމުބާރާތުގެ ޗެމްޕިއަން 1977، 1978، 2000، 2001، 2003 އަދި 2007 ވަނަ އަހަރު ހޯދިއިރު، ފްލޫމިނެންސް އިން ވަނީ 1999، 2020 އަދި 2021 ގައި މި މުބާރާތުގެ ޗެމްޕިއަންކަން ހޯދާފައެވެ. އަދި މި މުބާރާތުގެ އެންމެ ފަހުގެ ޗެމްޕިއަން ޓީމަކީ ބްރެޒިލްގެ ފްލެމެންގޯ އެވެ.

ފްލޫމިނެންސް އިން މިއަހަރުގެ މުބާރާތުގެ ފައިނަލުގެ ޖާގައެއް ކަށަވަރުކުރީ ސެމީފައިނަލްގެ ފުރަތަމަ މެޗުގައި ބްރެޒިލްގެ އިންޓަނޭސިއަނަލް 4-3 ގެ އެގްރިގޭޓް ނަތީޖާއަކުން ބަލިކުރުމަށްފަހު އެވެ. ފްލޫމިނެންސް ދަނޑުގައި މިދެޓީމު ވާދަކުރި ސެމީ ފައިނަލު ފުރަތަމަ ލެގުގެ މެޗު 2-2 ގެ ނަތީޖާއަކުން ދެޓީމް އެއްވަރުވިއިރު، އިންޓަނޭސިއަނަލް ގެ ދަނޑުގައި ކުޅުނު ދެވަނަ ލެގުގެ މެޗު ފްލޫމިނެންސް އިން ކާމިޔާބުކުރީ ވާދަވެރި ކުޅުމަކަށްފަހު 2-1 ގެ ނަތީޖާއަކުންނެވެ.

Advertisement

ބޮކާ ޖޫނިއާސް ފައިނަލުން ޖާގަ ހޯދީ ސެމީފައިނަލްގެ ދެވަނަ މެޗުގައި ބްރެޒިލްގެ ޕަލްމެއިރާސް އާއި ދެކޮޅަށް ކުޅުނު ދެމެޗު ވެސް އެއްވަރުވެ، ޕެނަލްޓީގައި 4-2 ގެ ނަތީޖާއަކުން ޕަލްމެއިރާސް ބަލިކުރުމަށްފަހު އެވެ. މިދެޓީމު ބޮކާ ޖޫނިއާސްގެ ދަނޑުގައި ކުޅުނު ފުރަތަމަ ލެގުގެ މެޗު 0-0 ގެ ނަތީޖާއަކުން ދެޓީމް އެއްވަރުވިއިރު، ޕަލްމެއިރާސް ދަނޑުގައި ކުޅުނު މެޗުގެ ފުރިހަމަ ވަގުތު ހަމަވިއިރު ދެޓީމް އޮތީ 1-1 ގެ ނަތީޖާއަކުން އެއްވަރުވެފައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ބޮކާ ޖޫނިއާސް އިންނެވެ. މިލަނޑު ފުރަތަމަ ހާފުގެ 23 ވަނަ މިނެޓުގައި ކާމިޔާބުކޮށްދިނީ އުރުގުއާއީގެ ތަޖުރިބާކާރު ފޯވާޑް އެޑިސަން ކަވާނީ އެވެ. މިމެޗުގެ ދެވަނަ ހާފުގެ 56 ވަނަ މިނެޓުގައި ބޮކާ ޖޫނިއާސްގެ އާޖެންޓީނާ ޑިފެންޑަރު މާކޯސް ރޯޖޯ އަށް ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލިއިރު، ފަހުހާފުގެ ބޮޑުބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

ޕަލްމެއިރާސް އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 73 ވަނަ މިނެޓުގައި ކާމިޔާބުކޮށްދިނީ އުރުގުއާއީގެ ޑިފެންޑަރު ވަކީން ޕިކްރޭޒް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ނަތީޖާ ނެރުމަށްޓަކައި ޖެހި ޕެނަލްޓީގައި ބޮކާ ޖޫނިއާސް އިން ޖެހި ފަސް ޕެނަލްޓީގެ ތެރެއިިން ހަތަރު ޕެނަލްޓީ އެޓީމުން ކާމިޔާބުކުރި އިރު، ކަވާނީގެ ޕެނަލްޓީ ޕަލްމެއިރާސް ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ. ޕަލްމެއިރާސް އިން ޖެހި ހަތަރު ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ދެ ޕެނަލްޓީއެވެ. 

ބްރެޒިލްގެ ފްލޫމިނެންސް އާއި އާޖެންޓީނާގެ ބޮކާ ޖޫނިއާސް ވާދަކުރާ ފައިނަލް މެޗު ކުޅުމަށް ހަމަޖެހިފައިވަނީ މިއަހަރުގެ ނޮވެންބަރު މަހުގެ 4 ވަނަ ދުވަހު އެވެ. އަދި މިދެޓީމު އެންމެ ފަހުން ވާދަކޮށްފައިވަނީ 2012 އަހަރުގެ މުބާރާތުގެ ކުއާޓާ ފައިނަލުގައެވެ. އެފަހަރު 2-1 ގެ އެގްރިގޭޓް ނަތީޖާއަކުން ފްލޫމިނެންސް ބަލިކޮށް ސެމީ ފައިނަލުން ޖާގަ ހޯދީ ބޮކާ ޖޫނިއާސް އެވެ. ނަމަވެސް 2012 ވަނަ އަހަރުގެ މުބާރާތުގެ ގުރޫޕް ސްޓޭޖުގައި ބޮކާ ޖޫނިއާސްގެ ދަނޑުގައި ކުޅުނު މެޗު ފްލޫމިނެންސް އިން ވަނީ 2-1 ގެ ނަތީޖާއަކުން ކާމިޔާބުކޮށްފައެވެ.