ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ބީގައި މިއަދު ހަވީރު ކުޅެވުނު ދެވަނަ މެޗުގައި ތާޖް އެގްޒޯޓިކާ ރިސޯޓް އެންޑް ސްޕާ އާއި އެނބޫދޫ ވިލެޖް ވާދަކުރި މެޗު ފަސޭހަކަމާއި އެކު 12-2 ގެ ތަފާތުބޮޑު ނަތީޖާއަކުން ކާމިޔާބުކޮށް ތާޖު އިން މުބާރާތުގެ ކުއާޓާ ފައިނަލުގެ ފުރުސަތު ބޮޑުކޮށްފި އެވެ.

މުބާރާތުގެ ފުރަތަަމަ މެޗުގައި ކަނޑޫމާ މޯލްޑިވްސް އާއި ދެކޮޅަށް ތާޖު އިން ކުޅުނު މެޗު 2-2 ގެ ނަތީޖާއަކުން ދެޓީމް އެއްވަރުވެފައި ވާއިރު، އެނބޫދޫ އިން ކުޅުނު ފުރަތަމަ މެޗުގައި އޮޅުވެލި އަތުން އެޓީމު ވަނީ 5-2 ގެ ނަތީޖާއަކުން ބަލިވެފަ އެވެ.

އިއްޔެގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ތާޖު އިން ވަނީ ދެ ލަނޑުގެ ލީޑެއް ނަގާފައެވެ. އަދި މެޗުގެ ތާޖު އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިހާފުގައި އެޓީމުން ވަނީ އިތުރު 10 ލަނޑު ކާމިޔާބުކޮށްފައެވެ.

މިމެޗުގައި ތާޖުގެ މުހައްމަދު އާސިފު ފަސް ލަނޑު ކާމިޔާބުކުރިއިރު، އެޓީމުގެ އަބްދުﷲ ޝާހީން ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ މޫސާ ލިވާޒް، މުހައްމަދު އަނާޒް، ހަސަން ލޫތުގެ އިތުރުން ނިހާން އަހުމަދު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

މިމެޗުގައި އެނބޫދޫ އިން ކާމިޔާބުކުރި ދެ ލަނޑު ވެސް ކާމިޔާބުކޮށްދިނީ އެޓީމުގެ އަބްދުﷲ ޒުހުރީއެވެ. މިއާއެކު މެޗުގެ ކުޅުން ނިމިގެންދިޔައީ 12-2 ގެ ނަތީޖާއަކުން ތާޖު ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ތާޖުގެ މުހައްމަދު އާސިފް އެވެ.

މިމެޗުން ލިބުނު ތިން ޕޮއިންޓާއެކު މުބާރާތުގައި ކުޅުނު ދެމެޗުން ހަތަރު ޕޮއިންޓް ހަމަކޮށް ގުރޫޕް ބީގެ އެއްވަނައިގައި ލަނޑުގެ ތަފާތުން މިވަގުތު އޮތީ ތާޖު އެވެ. އަދި މިމެޗުން ބަލިވި އެނބޫދޫ ކުޅުނު ދެ މެޗުން ވެސް ބަލިވެފައިވާ އިރު ބާކީ އެއް މެޗު އޮއްވައި އެޓީމު ވަނީ މުބާރާތުން ކަޓާފައެވެ.