ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ބީގައި މިއަދު ހަވީރު ކުޅެވުނު ފުރަތަމަ މެޗުގައި ހޮލިޑޭ އިން ރިސޯޓް ކަނޑޫމާ މޯލްޑިވްސް އާއި ސަން ސިޔާމް އޮޅުވެލި މޯލްޑިވްސް ވާދަކުރި މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މުބާރާތުގައި އޮޅުވެލި މޯލްޑިވްސް އިން ކުޅުނު ފުރަތަމަ މެޗުގައި 5-2 ގެ ނަތީޖާއަކުން އެނބޫދޫ އަތުން މޮޅުވެފައިވާއިރު، ކަނޑޫމާގެ ފުރަތަމަ މެޗުގައި ތާޖް އާއި ދެކޮޅަށް ކުޅުނު މެޗު ނިމުނީ 2-2 ގެ ނަތީޖާއަކުން ދެޓީމް އެއްވަރުވެގެންނެވެ.

ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ކަނޑޫމާ އިންނެވެ. މިލަނޑު ފުރަތަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ އެޓީމުގެ އިމްހާދު އަބްދުލް ގައްޔޫމް އެވެ.

މިއީ އެޓީމުގެ ހާފުތެރެއިން ހޯދި ބޯޅައެއް ހިފައިގެން ކުރިއަށް އަރައި އޮޅުވެލި މޯލްޑިވްސްގެ ހާފުގެ މެދެންހާ ހިސާބުހުރެ ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ކަނޑޫމާ ކުރީގައި އޮވެގެންނެވެ.

ދެވަނަ ހާފުގައި އޮޅުވެލި މޯލްޑިވްސް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ ފެށިގެން ދެވަނަ މިނެޓުގައި އެޓީމުގެ ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އަލީ ޝިއާއު އެވެ. މިއީ އެޓީމުގެ އާދަމް މަމްދޫން ތަނަވަސްކޮށްދިން ފުރުސަތެއްގައި ކަނޑޫމާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ފޮނުވާލި ބޯޅަ ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އޮޅުވެލި މޯލްޑިވްސްގެ އަލީ ޝިއާއު އެވެ.

މިމެޗުން ލިބުނު އެއް ޕޮއިންޓާއެކު މުބާރާތުގައި ކުޅުނު ދެމެޗުން އޮޅުވެލި މޯލްޑިވްސްއަށް ހަތަރު ޕޮއިންޓް ލިބިފައިވާއިރު، އެޓީމު މިވަގުތު އޮތީ ގްރޫޕްގެ ބީގެ ދެވަނައިގައެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ދެ މެޗުން ކަނޑޫމާއަށް ދެ ޕޮއިންޓް ލިބިފައިވާއިރު ގުރޫޕް ސްޓޭޖުގެ ފަހު މެޗުގައި އެނބޫދޫ އަތުން މޮޅުވެ މުބާރާތުގެ ކުއާޓާ ފައިނަލުން ޖާގަ ހޯދުމުގެ ފުރުސަތު އެޓީމަށް ވެސް އެބައޮތެވެ.