އަފްޣާނިސްތާނަށް ބާރުގަދަ ބިންހެލުމެއް އައިސް 100 އަށްވުރެ ގިނަ މީހުން މަރުވެއްޖެއެވެ.

އަފްޣާނިސްތާނަށް އައިސްފައިވަނީ 6.3 މެގްނެޓިޔުޓްގެ ބިންހެލުމެކެވެ. ބިންހެލުން އައިސްފައިވަނީ ހީރަތް ސިޓީގެ ހުޅަނގު ސަރަހައްދަށެވެ. އަދި ބިންހެލުމަށް ފަހު ބާރުގަދަ "އާފްޓަރ ޝޮކްސް" ތަކެއް އައިސް ފައިވާ ކަމަށް އަލްޖްޒީރާގައި ބުނެފައިވެއެވެ.

އަފްޣާނިސްތާނުގެ ޑިފެންސް މިނިސްޓްރީ އިން ކޮށްފައިވާ ޓްވީޓެއްގައި ބުނެފައިވަނީ އަފްޣާނިސްތާނަށް ހޮނިހިރު ދުވަހު އައި ބިންހެލުމުގައި 100 މީހަކު މަރިވެފައިވާ ކަމަށާއި 500 އެއްހާ މީހުންނަށް އެކިވަރުގެ އަނިޔާ ލިބިފައިވާ ކަމަށެވެ. އަދި މިޢަދަދު ތައް އިތުރަށް މަތިވެގެން ދާނެ ކަމަށް ވަނީ ލަފާ ކޮށްފައެވެ.

ބިންހެލުން އައި ސަރަހައްދުގެ ރައްޔިތަކު ބުނެފައިވަނީ  އެސަރަހައްދުގެ ގެތަކުން ރައްޔިތުން ވަނީ ނުކުމެފައި ކަމަށާއި، ފިހާރަ ތަކާއި އޮފީސް ޢިމާރާތްތައް ހުސްކޮށް ފައިވާ ކަމަށެވެ. އޭނާ އިތުރަށް ބުނެފައިވަނީ އަދިވެސް އިތުރަށް ބިންހެލުން އައިސްފާނެ ކަމަށް ލަފާ ކޮށްފައިވާކަމަށެވެ.

އެމެރިކާގެ ޖިއޮލޮޖިކަލް ސާވޭ އިން ބުނެފައިވަނީ ބިންހެލުމުގެ އަސަރު ހީރަތް ސިޓީގެ 40 ކިލޯމީޓަރަށް ކޮށްފައިވާ ކަމަށެވެ. އަދި އެއާއި ގުޅިގެން ބާރުގަދަ ތިން "އާފްޓަރ ޝޮކް" އައިސްފައިވާ ކަމަށެވެ.