އިންތިޚާބީ ރައީސް ޑރ. މުހައްމަދު މުޢިއްޒު ގެ ނަމުގައި ފޭކު ޓެލެގްރާމް މެސެޖުތަކެއް ދައުރު ކުރަމުންދާތީ ސަމާލުވާން އެދިއްޖެއެވެ. 

އިންތިޚާބީ ރައީސް އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުން ނިންމަވާ ލައްވަމުން، އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް ވަނީ އިންތިޚާބީ ރައީސް ޑރ. މުޢިއްޒުގެ ނަމުގައި، އެމަނިކުފާނާއި ބައްދަލު ކުރެއްވުމަށް އެދި އަދި އެމަނިކުފާނާއިއެކު ބައެއް ބައްދަލުވުންތަކުގައި ބައިވެރިވެ ވަޑައިގެންނެވުމަށް އެދި ޓެލެގްރާމް މެދުވެރިކޮށް މެސެޖުތަކެއް ދައުރު ކުރަމުންދާ ކަން ފާހަގަކުރައްވާފައެވެ. 

ފިރުޒުލް ވަނީ އެއީ ޑރ. މުޢިއްޒުގެ ފަރާތުން ކުރައްވަމުންދާ މެސެޖުތަކެއް ނޫން ކަން ފާހަގަކުރައްވައި އެކަން ކަމާއިމެދު ސަމާލުވުމަށް އެންމެހާ ރައްޔިތުންނަށް އިލްތިމާސްކުރައްވާފައެވެ. 

މީގެ ކުރިންވެސް ޑރ. މުޢިއްޒު، މާލެ ސިޓީ ކައުންސިލްގެ މޭޔަރު ކަމުގައި ޒިންމާ އަދާކުރައްވަމުންދިޔަ އިރު، އެމަނިކުފާނު ނަމުގައި ފޭކު މަސެޖުތަކެއް ދައުރުކޮށްފައިއެވެ. 

މިފަހަކަށް އައިސް، މަކަރާއި ޙީލަތުން ފައިސާ ހޯދާ ފަރާތްތަކުން އަންނަނީ މިފަދަ އެކިއެކި މަގުތައް ބޭނުން ކޮށްގެން ޢާއްމުންގެ އަތުން ފައިސާ ފޭރުމަށް މަސައްކަތް ކުރަމުންނެވެ. މިފަދަ ކަންކަމަށް އާއްމުން ސަމާލުވެ ތިބުމަށް ތަކުރާރުކޮށް ފުލުހުން ވެސް އަންނަނީ އިލްތިމާސްކުރަމުންނެވެ.