ސްޕެނިޝް ލަލީގާގައި މިރޭ ރަށުން ބޭރުގައި 2-2 ގެ ނަތީޖާއަކުން ގްރަނާޑާ އާއި އެއްވަރުވެ، ލީގު ތާވަލުގެ ދެވަނައަށް ކުރިއަށް ޖެހިލަން ލިބުނު ފުރުސަތު ބާސެލޯނާ އިން ނަގާލައިފިއެވެ.

މިދެޓީމު އެންމެ ފަހުން ކުޅުނު ހަތަރު މެޗުގެ ތެރެއިިން ބާސެލޯނާއަށް މޮޅެއް ހޯދިފައިނުވާއިރު، އެންމެ ފަހުން ކުޅުނު ތިން މެޗުވެސް ނިމިފައި ވަނީ ދެޓީމު އެއްވަރުވެގެންނެވެ.

އަނިޔާގެ ސަބަބުން ޕޮލެންޑް ފޯވާޑް ރޮބަޓް ލެވަންޑޮވްސްކީ އާއި ބްރެޒިލްގެ ފޯވާޑް ރަފީނިއާގެ އިތުރުން މިޑްފީލްޑަރު ޕެޑްރީ އާއި ނުލައި މިމެޗު ބާސެލޯނާ އިން ފެށިއިރު، މެޗު ފެށިގެން ފުރަތަމަ މިނެޓުގައި ގްރަނާޑާ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

Advertisement

މިލަނޑު އެޓީމަށް ކާމިޔާބުކޮށްދިނީ ޒުވާން ފޯވާޑް ބްރަޔަން ޒަރަގޯޒާ އެވެ. މިއީ އެޓީމުގެ ފޯވާޑް ލޫކަސް ބޯއި ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި ބާސެލޯނާ ޓީމުން ނަތީޖާ އެއްވަރުކުރުމަށް އެންމެ ހުސް ފުރުސަތެއް ލިބި އެޓީމުގެ ޕޯޗުގަލް ފޯވާޑް ޖޮއާއު ފެލިކްސް އަށެވެ. ނަމަވެސް އޭނާ ފޮނުވާލި ހަމަލާ ގްރަނާޑާ ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

މިމެޗުގައި ގްރަނާޑާ އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ޒަރަގޯޒާ އެވެ. ނަމަވެސް ފުރަތަމަ ހާފު ނިމުމުގެ ކުރިން ބާސެލޯނާ އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ.

މިލަނޑު އެޓީމަށް ކާމިޔާބުކޮށްދިނީ ޒުވާން ފޯވާޑް ލަމައިން ޔަމާލް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ގްރަނާޑާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބާސެލޯނާ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި އެޓީމުގެ ފޯވާޑް ފަރާން ޓޮރޭސް އާއި ޑިފެންޑަރު ރޮނާލްޑް އަރައުޖޯ އަށް ލިބުނު ފުރުސަތުތަކުގެ ބޭނުން ނުކުރެވި ދިޔައިރު، އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 85 ވަނަ މިނެޓުގައި ކާމިޔާބުކޮށްދިނީ ސާޖިއޯ ރޮބާޓޯ ސާޖިއޯ ރޮބާޓޯ އެވެ.

މިއީ އެޓީމުގެ ޒުވާން ޑިފެންޑަރު އަލެޖަންޑްރޯ ބަލްޑޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މެޗުގެ އިތުރު ވަގުތުގެ ތެރޭގައި އެޓީމުގެ ޖޮއާއު ފެލިކްސް ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިއާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ލީގުގައި ކުޅުނު 9 މެޗުން ބާސެލޯނާ އަށް 21 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ތިންވަނައިގައެވެ.

އިންޓަނޭޝަނަލް ބްރޭކަށް ލީގުގެ ކުޅުން މެދުކަނޑާލިއިރު، ލީގު ތާވަލުގެ އެއްވަނައިގައި 24 ޕޮއިންޓާއެކު މިވަގުތު އޮތީ ރެއާލް މެޑްރިޑެވެ. އަދި ދެވަނަގައި އޮތީ 22 ޕޮއިންޓާއެކު އޮތް ޖިރޯނާ އެވެ. އަދި މިމެޗުން ލިބުނު އެއް ޕޮއިންޓާއެކު ލީގުގައި ކުޅުނު 9 މެޗުން ގްރަނާޑާއަށް 6 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 19: ވަނައިގައެވެ.