ވެރިކަން ބަދަލުވުމުގެ އިންތިޤާލީ މަރުހަލާގައި އައު އިތުރު މުވައްޒަފުން ނެގުމުގައި ޢަމަލު ކުރަންވީ ގޮތް ސިވިލް ސާވިސް ކޮމިޝަނުން ސަރުކާރުގެ އިދާރާތަކަށް އަންގައިފިއެވެ.

ސިވިލް ސާވިސް ކޮމިޝަނުން ނެރެފައިވާ ސާކިޔުލާއެއްގައި ބުނެފައިވަނީ އައު މުވައްޒަފުން ނެގުމުގައި އެކޮމިޝަނުން އަންގައިފައިވާ ގޮތައް ޢަމަލު ކުރުމަށެވެ.

އެގޮތުން ޓީޗަރުންނާއި ޑޮކްޓަރުންނާއި ނަރުހުންނާއި މުދިމުންނާއި އިމާމުންގެ މަޤާމުތަކަކީ އެ ޚިދުމަތްތައް މެދުނުކެނޑި ކޮންމެހެން ފޯރުކޮށްދިނުމަށް ބޭނުންވާ މަޤާމުތަކަކަށްވާތީ އެ މަޤާމުތަކަށް މިހާރުވެސް ކަނޑައެޅިފައިވާ އުޞޫލުތަކުގެ ތެރެއިން މުވައްޒަފުން ހަމަޖެއްސުމުގެ މަސައްކަތް ކުރިއަށްގެންދިއުމަށް ވަނީ އަންގައިފައެވެ.

Advertisement

ކޮންމެހެން ބޭނުންވާ އެފަދަ މުވައްޒަފުން ފިޔަވައި، މި ހިނދަށް ކޮންމެހެން އިޢުލާންކުރުމަށް ބޭނުންވާ މަޤާމެއް ނަމަ ސަބަބު ބަޔާންކޮށް ކޮމިޝަނަށް ލިޔެ ހުއްދަހޯދުމަށްފަހުގައި މެނުވީ އިޢުލާންނުކުރުމަށް ވެސް އެސާކިޔުލާގައި ވަނީ އަންގައިފައެވެ.

ހަމަމިއާއި އެކު މިހާތަނަށް އިޢުލާންކޮށްފައިވާ މަޤާމުތަކުގެ ތެރެއިން އޮފަރލެޓަރ ދީފައިނުވާ މަޤާމުތަކަށް ވަޒީފާ ހަމަޖެއްސުން މަޑުޖައްސައިލުމަށާއި، އަދި މި މަޤާމުތަކުގެ ތެރެއިން މުވައްޒަފަކު ވަކިވުމާ ގުޅިގެން ހުސްވެފައިވާ މަޤާމުތައް ނުވަތަ މި ވަގުތައް ކޮންމެހެން މީހަކު ބޭނުންވާ މަޤާމެއް ނަމަ ސަބަބު ބަޔާންކޮށް ކޮމިޝަނަށް ލިޔެ ، ހުއްދަހޯދުމަށްވެސް ވަނީ އެކޮމިޝަނުން އަންގައިފައެވެ.

މީގެ އިތުރުން އިދާރާތަކުގެ އިދާރީ އޮނިގަނޑު މުރާޖައާކުރުމާއި އައު މަޤާމުތައް އުފެއްދުމާއި އިދާރީ އޮނިގަނޑަށް އަލަށް ދެވިފައިވާ މަޤާމުތަކަށް މީހުން ހޯދުން މަޑުޖައްސައިލުމަށް އަންގަވައިފައިވެއެވެ. އަދި އިންޓަރނަލީ އިޢުލާންކޮށްގެން ވަޒީފާގެ ކުރިއެރުން ދިނުމަށް ހަމަޖެހިފައިވާ އޮނިގަނޑުތަކުގެ މަޤާމުތަކަށް މިހާތަނަށްކޮށްފައިވާ އިޢުލާންތަކާ ގުޅިގެން ކުރިއެރުންދިނުން މަޑުޖައްސައިލުމަށާއި،  މި ފަދަ މަޤާމުތަކަށް އިތުރަށް އިޢުލާންކުރުން މި ހިނދަށް މަޑުޖައްސައިލުމަށް ވަނީ އަންގައިފައެވެ.

ސިވިލް ސަރވިސްގެ އިދާރާތަކަށް ކޮންޓްރެކްޓް، ވޭޖް، ކޮންސަލްޓެންސީގެ އުޞޫލުން މީހުން ހަމަޖެއްސުން މަޑުޖައްސައިލުމަށާއި، މި ހިނދަށް ކޮންމެހެން އިޢުލާންކުރުމަށް ބޭނުންވާ މަޤާމެއް ނަމަ ސަބަބު ބަޔާންކޮށް ކޮމިޝަނަށް ލިޔެހުއްދަހޯދުމަށްފަހުގައި މެނުވީ އިޢުލާންނުކުރުމަށް ވަނީ އަންގައިފައެވެ.