އޭއެފްސީ ފުޓްސަލް އޭޝިއަން ކަޕް ކޮލިފައިންގައި މިއަދު ހަވީރު ލެބަނަން އާއި ދެކޮޅަށް ކުޅުނު މެޗުން 6-1 ގެ ނަތީޖާއަކުން ދިވެހިރާއްޖެ ބަލިވެއްޖެ އެވެ.

މުބާރާތުގެ ފުރަތަަމަ މެޗުގައި ވަރުގަދަ އީރާން އަތުން 18-2 ގެ ތަފާތުބޮޑު ނަތީޖާއަކުން ބަލިވި ނަމަވެސް މިމެޗުގެ ފުރަތަމަ ހާފުގައި ދިވެހި ޓީމުގެ ފަރާތުން ވަނީ ތަފާތު މޮޅު ކުޅުމެއް ފެނިގެން ގޮސްފައެވެ.

އެގޮތުން ފުރަތަމަ ހާފުގެ ކުރީކޮޅު ރާއްޖެ ޓީމުގެ ޝިޔާހް އަށް މެޗުގެ ލީޑު ނެގުމަށް ވަނީ ވަރަށް ހުސް ފުރުސަތެއް ލިބިފައެވެ. ނަމަވެސް އޭނާ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ދިވެހި ޓީމުންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އަލީ ހާފިޒް އެވެ. މިއީ ރާއްޖެ ޓީމުގެ ގޯލްކީޕަރު ޒައިދާން ކުރިއަށް އެއްލި ބޯޅައެއް ކޮންޓްރޯލް ކުރުމަށް ފަހު ކައިރީގައި ތިބި ދެކުޅުންތެރިން ކައިރިން ނައްޓާލުމަށް ފަހު ބޯޅައާއެކު ކުރިއަށް އަރައި ލެބަނަންގެ ކީއްޕަރު ކައިރިން ވެސް ނައްޓާލުމަށް ފަހު ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ލެބަނަން އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކުރި އިރު، އޭގެ ހަތަރު މިނެޓު ފަހުން އެޓީމުން ވަނީ އިތުރު ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ލެބަނަން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ލެބަނަން އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިހާފުގައި އެޓީމުން އިތުރު ހަތަރު ލަނޑު ކާމިޔާބުކުރިއިރު، އެޓީމުގެ ތިންވަނަ ލަނޑު ޖެހީ ދެވަނަ ހާފުގެ އަށްވަނަ މިނިޓުގަ އެވެ. އަދި އޭގެ ދެ މިނިޓު ފަހުން އެޓީމުގެ ހަތަރުވަނަ ގޯލު ކާމިޔާބުކުރިއިރު، މެޗުގެ ފަހު ފަސް މިނިޓު ތެރޭގައި އެޓީމުން ވަނީ އިތުރު ދެ ލަނޑު ކާމިޔާބުކޮށްފައެވެ.

ލެބަނަން އަކީ 2003 އިން ފެށިގެން ގަވާއިދުން އޭޝިއަން ކަޕްގައި ވާދަ ކުރަމުން އަންނަ ޓީމެކެވެ. އޭޝިއަން ކަޕްގައި 11 ފަހަރު ވާދަ ކޮށްފައި ވާއިރު އޭގެ ތެރެއިން ހަތް ފަހަރު އެޓީމު ވަނީ ކުއާޓާ ފައިނަލުން ޖާގަ ހޯދާފައެވެ.

ކޮލިފައިންގައި ރާއްޖެ ވާދަކުރާ ފަހު މެޗުގައި ބުދަ ދުވަހު މެންދުރުފަހު 3 ޖަހާއިރު ނުކުންނާނީ ކިރިގިސްތާނާ ދެކޮޅަށެވެ. ކިރިގިސްތާނުގެ ފުރަތަމަ މެޗުގައި އެޓީމުން ވަނީ 5-4 ގެ ނަތީޖާއަކުން ލެބަނަންގެ މައްޗަށް ކުރި ހޯދައިފަ އެވެ.