2034 ވަނަ އަހަރުގެ ފީފާ ވޯލްޑް ބޭއްމަށް، ސައުދީ އަރަބިޔާ އިން ފީފާއަށް ރަސްމީކޮށް ލިޔުމުން ހުށަހަޅައިފި އެވެ.
މީޑިއާ ރިޕޯޓްތައް ބުނާގޮތުގައި ސައުދީން ވަނީ ފީފާ ވޯލްޑް ކަޕް އެ ޤައުމުގައި ބޭއްވުމުގެ ޝައުޤުވެރިކަން މިދިޔަ ހަފްތާގައި ފާޅުކޮށްފަ އެވެ. އެއަށްފަހު ހޯމަ ދުވަހު އެ ޤައުމުގެ ފުޓުބޯޅަ ފެޑެރޭޝަނުން ވަނީ އެކަމަށްޓަކައި ހުށަހަޅަން ޖެހޭ ލިޔެކިޔުންތައް ރަސްމީކޮށް ފީފާ އަށް ހުށަހަޅައިފަ އެވެ.
މީޑިއާ އަށް މައުލޫމާތު ދެއްވަމުން ސައުދީ ފުޓުބޯޅަ ފެޑެރޭޝަންގެ ރައީސް ޔާސިރު އަލް މިޝާލް ވިދާޅުވީ، ހޯމަ ދުވަހު ރަސްމީކޮށް ހުށަހެޅުނު ހުށަހެޅުމާއެކު އެ ޤައުމުގެ ރައްޔިތުންގެ ހުވަފެންތައް ހަގީގަތަކަށް ވެގެން ދާނެ ކަމުގެ އުންމީދު ބޮޑު ކަމަށެވެ. ޚާއްސަކޮށް ސައުދީގެ ބިޑަށް ގިނަ ޤައުމުތަކަކުން ތާއީދު ކޮށްފައިވާ ކަމަށް ވެސް އޭނާ ވަނީ ވިދާޅުވެފަ އެވެ. އިތުރަށް ވާހަކަ ދައްކަމުން އޭނާ ވިދާޅުވީ، ފުޓްބޯޅައިގެ ޒަރިއްޔާއިން މުޅި ދުނިޔެ އެއްބައިވަންތަކުރުމަށް މަގުފަހިވެގެންދާނެ އެންމެ ވާދަވެރި ބިޑެއް ހުށަހަޅަން އެ ޤައުމުން ވަރަށް ބޮޑަށް މަސައްކަތް ކޮށްފައިވާނެ ކަމަށެވެ.
ސައުދީގެ ފުޓުބޯޅަ ފެޑެރޭޝަނުން ބުނެފައިވާ ގޮތުގައި މުބާރާތް ބޭއްވުމުގެ ޝައުޤުވެރިކަން މިދިޔަ ހަފްތާގެ ބުދަ ދުވަހު އެ ޤައުމުން ހާމަކުރުމާއެކު، ފީފާގެ 70 އަށް ވުރެ ގިނަ މެމްބަރު ޤައުމުތަކުން ވަނީ އެކަމަށް ތާއީދުކޮށްފަ އެވެ.
މީގެ އިތުރުން ސައުދީން އަންނަނީ އެ ޤައުމުގެ ފުޓްބޯޅަ ލީގު ވަރުގަދަ ކުރުމުގެ މަސައްކަތް ކުރަމުންނެވެ. އަދި މިއަހަރުގެ ފީފާ ކުލަބު ވޯލްޑް ކަޕާއި، 2027 ވަނަ އަހަރު އޭއެފްސީ އޭޝިއަން ކަޕް ވެސް ބޭއްވުމަށް ހަމަޖެހިފައިވަނީ އެ ޤައުމުގަ އެވެ.
Advertisement
This content is created and paid for by advertisers and does not involve Voice Journalists
