އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުއިއްޒާއި އެމަނިކުފާނުގެ ނައިބު ހުސެއިން މުހައްމަދު ލަތީފު މަގާމުގެ ހުވާކުރެއްވުމުގެ ޖަލްސާގެ އިންތިޒާމުތަކާ ގުޅޭގޮތުން، ރައްޔިތުންގެ މަޖިލީހާއި އިންތިޚާބީ ރައީސުލްޖުމްހޫރިއްޔާގެ އޮފީހުގެ އިސް ބޭފުޅުންނާ މަޝްވަރާކުރައްވައިފި އެވެ.
މި ބައްދަލުކުރެއްވުން ބާއްވާފައިވަނީ ރައްޔިތުންގެ މަޖިލީހުގެ އިދާރާގައެވެ.
މިބައްދަލުކުރެއްވުމުގައި ރައްޔިތުންގެ މަޖިލީހުގެ އިދާރާގެ ފަރާތުން އިސްކޮށް ބައިވެރިވެވަޑައިގަތީ މަޖިލީހުގެ އަމީން ޢާންމު ފާތިމަތު ލިއުޝާއެވެ. އަދި އިންތިޚާބީ ރައީސުލްޖުމްހޫރިއްޔާގެ އޮފީހުގެ އިސް ބޭފުޅެއްގެ ގޮތުން ބައިވެރިވެވަޑައިގަތީ، ޓްރާންސިޝަން ކޮމިޓީގެ އިސް ވެރިޔާ އަބްދުއްރަހީމް އަބްދުالله އެވެ.
މީގެ އިތުރުން މަޖިލީހާއި، ޓްރާންސިޝަލް ކޮމިޓީގެ އިސް ބޭފުޅުން ބައިވެރިވެވަޑައިގެންނެވިއެވެ.
މި ބައްދަލުކުރެއްވުމުގައި މައިގަނޑުގޮތެއްގައި މަޝްވަރާކުރައްވާފައިވަނީ، ޖަލްސާ ކުރިއަށްގެންދަވާނެ ތަނަކާއި، ބައިވެރިވެވަޑައިގަންނަވާ ބޭފުޅުންނަށް ދަޢުވަތުއެރުވުމާއި އަދި އިންތިޒާމްތައް ހަމަޖެއްސުމުގެ ކަންކަމާއި ގުޅޭގޮތުންނެވެ.
މިއީ ދެފަރާތުގެ ދެމެދުގައި މިގޮތަށް ބޭއްވި ފުރަތަމަ ރަސްމީ ބައްދަލުކުރެއްވުމެވެ.
އިންތިގާލީ މަރުހަލާގެ ކަންކަން ކުރިއަށްދާ ގޮތާއި ގުޅޭގޮތުން ނޫސްވެރިންނަށް މައުލޫމާތުދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވީ އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގެންފައިވާގޮތަށް، ހުވާ ކުރެއްވުމުގެ ރަސްމިއްޔާތު ޖުމްހޫރީ މައިދާނުގައި ބާއްވާގޮތަށް ނިންމަވާފައިވާކަމަށެވެ.
މިޖަލްސާ އޮންނާނީ ނޮވެމްބަރު މަހުގެ 17 ވާ ހުކުރު ދުވަހުގެ ހަވީރުއެވެ.
އެގޮތަށް ނިންމެވީ ޑރ މުއިއްޒު ހުވާކުރެއްވުމުގެ ރަސްމިއްޔާތުގައި ވީހާވެސް ގިނަ އާންމު ރައްޔިތުންނަށް ބައިވެރިވުމުގެ ފުރުސަތު ފަހިކޮށްދިނުމަށް ކަމަށް އިންތިޤާލީ ތަރުޖަމާނު ވިދާޅުވި އެވެ.
ނަމަވެސް މިދުވަސްވަރަކީ މޫސުން ގޯސް ދުވަސްވަރެއްކަމުން، ޖުމްހޫރީ މައިދާނުގައި ޖަލްސާ ކުރިއަށް ނުގެންދެވޭނަމަ ދެން ޢަމަލުކުރާނެ ގޮތްތަކާ ގުޅޭގޮތުންވެސް އަންނަނީ މަޝްވަރާކުރެއްވުމަ ށެވެ.
Advertisement
This content is created and paid for by advertisers and does not involve Voice Journalists
