ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ޑީގައި މިއަދު ހަވީރު ކުޅެވުނު ދެވަނަ މެޗުގައި ވާދަވެރި ކުޅުމަކަށްފަހު 5-3 ގެ ނަތީޖާއަކުން ސައި ލެގޫން ބަލިކޮށް ގުރޫޕް ޑީގެ ދެވަނަ ވޯލްޑޯފް އެސްޓޯރިއާ މޯލްޑިވްސް އިތާފުށިން ހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ސައު ލެގޫން އިންނެވެ. މިލަނޑު ފުރަތަމަ ހާފުގެ 7 ވަނަ މިނެޓުގައި ކާމިޔާބުކޮށްދިނީ އެޓީމުގެ ހުސެއިން ސާޒިލްއެވެ. މިއީ އެޓީމަށް ލިބުނު ކޯނަރެއްގައި ކެޕްޓަން ޢަބްދުالله މުހައްމަދު ހުރަސްކޮށްދިން ބޯޅައެއް އިތާފުށީގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

އިތާފުށިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޢަބްދުالله ރަބާޙް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން ދެވަނަ މިނެޓުގައި ސައި ލެގޫން އިން ލަނޑެއް ކާމިޔާބުކޮށް މިމެޗުގައި ދެވަނަ ފަހަރަށް ލީޑު ހޯދިއެވެ. މިއީ އެޓީމުގެ ކުޅުންތެރިއަކު ފޮނުވާލި ބޯޅައެއް ދިފާއުކުރަން އުޅުމުގެތެރޭގައި އިތާފުށީގެ މޫސާ ހުމެއިދު އަތުން ބައިކޮޅަށް ވަން ލަނޑެކެވެ. ނަމަވެސް އޭގެ ހަތަރު މިނެޓު ފަހުން އިތާފުށީގެ ރިޝްވާން އިބްރާހިމް ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދިނެވެ.

ނަމަވެސް ޖެހިގެން އައި މިނެޓުގައި ސައި ލެގޫންގެ މުހައްމަދު ހައެޝަމް ވަނީ ލަނޑެއް ކާމިޔާބުކޮށް މިމެޗުގައި ތިންވަނަ ފަހަރަށް އެޓީމަށް ލީޑު ހޯދައިދީފައެވެ.

އިތާފުށިން މިމެޗުގައި ތިންވަނަ ފަހަރަށް ނަތީޖާ އެއްވަރުކުރި ލަނޑު ދެވަނަ ހާފުގެ 34 ވަނަ މިނެޓުގައި ކާމިޔާބުކޮށްދިނީ އެޓީމުގެ މޫސާ ހުމެއިދު އެވެ. އަދި މިމެޗުގައި އެޓީމުން ފުރަތަމަ ފަހަރަށް ލީޑު ހޯދި ލަނޑު ދެވަނަ ހާފުގެ 40 ވަނަ މިނެޓުގައި އެޓީމަށް ކާމިޔާބުކޮށްދިނީ ޢަބްދުالله ރިމާހް އެވެ. އަދި މެޗުގެ އިތުރު ވަގުތުގެ ތެރޭގައި ރިމާހް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިލަނޑާއެކު މެޗުގެ ކުޅުން ނިމިގެންދިޔައީ 5-3 ގެ ނަތީޖާއަކުން އިތާފުށި ކުރީގައި އޮވެގެންނެވެ.

މިމެޗުގެ މޭން އޮފް ދަ މެޗަކަށް ހޮވުނީ އިތާފުށީގެ އަބްދުﷲ ރިހާމް އެވެ.

މިމެޗުން ލިބުނު ތިން ޕޮއިންޓާއެކު އިތާފުށިން ގުރޫޕް ސްޓޭޖުގެ މެޗުތައް ނިންމާލީ ކުޅުނު ދެ މެޗުން ލިބުނު ތިން ޕޮއިންޓާއެކު ގްރޫޕް ޑީގެ ދެވަނައިގައެވެ. މިގުރޫޕްގެ އެއްވަނަ ޓީމުގެ ގޮތުގައި ހާޑްރޮކް އިން ކުއާޓާގެ ޖާގައެއް ކަށަވަރުކޮށްފައިވާއިރު، ގްރޫޕް ޑީ އިން ކުއާޓާގެ ދެވަަނަ ޖާގަ ލިބޭނީ މިގުރޫޕްގެ ޕްލޭއޮފްގައި ސައި ލެގޫން އާއި އިތާފުށީ ވާދަކުރާ މެޗުން މޮޅުވާ ޓީމަކަށެވެ.