"ޔުއެފާ ޔޫރޯ 2028" އިނގިރޭސިވިލާތާއި، އަޔަލޭންޑުގައި ބާއްވަން ޔޫރަޕުގެ ފުޓުބޯޅައިގެ މައި އިދާރާ (ޔުއެފާ) އިން ނިންމައިފި އެވެ.

ޔުއެފާ އިން މިކަން ރަސްމީކޮށް އިޢުލާންކޮށްފައި ވަނީ އަންގާރަ ދުވަހު އެވެ. ޔުއެފާގެ ރައީސް އެލެކްސެންޑާ ޗެފެރިން މިކަން ހާމަކުރެއްވީ ބިޑު ވަފުދުތަކާއެކު ބޭއްވި ރަސްމިއްޔާތެއްގަ އެވެ. އަދި މިރަސްމިއްޔާތުގައި ވާހަކަފުޅު ދައްކަވަމުން ޗެފެރިން ވިދާޅުވީ، ބީލަން ހުށަހަޅާ ފަރާތްތަކަށާއި، ހޯސްޓް އެސޯސިއޭޝަންތަކަށް އޭނާ މަރުޙަބާ ދަންނަވާ ކަމަަށާއި، އެއެސޯސިއޭޝަންތަކުގެ އިޚްލާޞްތެރިކަމާއި، ބުރަ މަސައްކަތާއި، ޢަޒުމު ވަރަށް ފުރިހަމަ އަށް ބަލައިގަންނަ ކަމަށެވެ.

މިއީ ޔޫރޯ ފުޓުބޯޅަ މުބާރާތް އިގިރޭސިވިލާތުގައި ބާއްވާ ތިން ވަނަ ފަހަރެވެ. މީގެ ކުރިން އެ ޤައުމުން ވަނީ 1996 ވަނަ އަހަރުގެ މުބާރާތުގެ އިތުރުން 2020 ވަނަ އަހަރުގެ މުބާރާތް ހޯސްޓު ކޮށްފަ އެވެ.

Advertisement

2028 ވަނަ އަހަރުގެ ޔޫރޯ ފުޓުބޯޅަ މުބާރާތް ބާއްވާނެ ސްޓޭޑިއަމްތަކަކީ، ލަންޑަންގެ ވެމްބްލީ ސްޓޭޑިއަމް، ކާޑިފްގައި ހުންނަ ވޭލްސްގެ ޤައުމީ ސްޓޭޑިއަމް، ލަންޑަންގައި ހުންނަ ޓޮޓެންހަމްގެ ސްޓޭޑިއަމް، މެންޗެސްޓަރ ސްޓޭޑިއަމް، ލިވަޕޫލްގައި ހުންނަ އެވަޓަން ސްޓޭޑިއަމް، ނިއުކާސަލްގައި ހުންނަ އެސްޓީ ޖޭމްސް ޕާކް ސްޓޭޑިއަމް، ބާމިންހަމްގައި ހުންނަ ވިލާ ޕާކް ސްޓޭޑިއަމް، ގްލަސްގޯ ގައި ހުންނަ ހެމްޕްޑެން ޕާކް ސްޓޭޑިއަމް، ޑުބްލިންގައި ހުންނަ ޑުބްލިން އެރީނާ އަދި ބެލްފާސްޓްގައި ހުންނަ ކޭސްމެންޓް ޕާކް ހިމެނެ އެވެ.

މީގެ ތެރެއިން ބައެއް ސްޓޭޑިއަމްތަކަކީ މުބާރާތަށް ޚާއްސަކޮށްގެން އަލަށް ޤާއިމު ކުރާނެ ސްޓޭޑިއަމްތަކެކެވެ. އަދި ބައެއް ސްޓޭޑިއަމްތައް މިމުބާރާތަށް މަރާމާތު ކުރުމަށްވަނީ ހަމަޖެހިފަ އެވެ.